Замын-Үүд чөлөөт бүсийг олон улсын туршлага, бүс нутгийн онцлогт нийцүүлсэн стратеги, төлөвлөлтөөр хангаж, бүтээн байгуулалтын ажлыг эрчимжүүлэх саналыг боловсруулан, газар олголтыг шалгаж, түүнтэй холбоотой дүгнэлтийг Засгийн газрын хуралдаанд танилцуулахыг Ерөнхий сайд өнөөдөр үүрэг болголоо.

Мөн ашиг сонирхлын зөрчил үүсэж болзошгүй нөхцөл байдлаас урьдчилан сэргийлэх зорилгоор гаалийн улсын байцаагчдыг сэлгэн ажиллуулах, боомтод ажиллаж байгаа хилийн хяналтын болон орон нутгийн засаг захиргааны байгууллага, аж ахуйн нэгжүүдийн уялдаа холбоог нэгдсэн удирдлага, зохицуулалтаар хангаж, ажлыг эрчимжүүлэхийг даалгав.

Түүнчлэн тус сум дахь Хилийн цэргийн 0108 дугаар ангийн 48 айлын орон сууцны барилгыг ашиглалтад оруулахад шаардлагатай санхүүжилтийг шийдвэрлэлээ. Ерөнхий сайд томилолтынхоо хугацаанд Замын-Үүд чөлөөт бүс, Замын-Үүдийн автозамын боомтын зорчигч, ачаа тээврийн цогцолбортой тус тус танилцаж, үйл ажиллагаа явуулж байгаа хил, гааль, хяналтын байгууллагын удирдлага, зорчигч, ачаа тээврийн үйл ажиллагаа эрхэлдэг аж ахуйн нэгж, иргэдийн төлөөлөл болон Замын-Үүд сумын иргэдтэй уулзалт хийсэн юм.

Алтанширээ дэх Аж үйлдвэрийн парк, Сайншанд суманд барьсан "Мандах наран" хорооллын бүтээн байгуулалттай танилцаж, Дорноговь аймгийн иргэдтэй уулзалт хийсэн юм.