Xicoia Studio хиймэл оюун ухаанаар бүтээгдсэн анхны жүжигчин эмэгтэйг олон нийтэд танилцууллаа. Түүнийг Тилли Норвуд хэмээн нэрлэсэн бөгөөд Инстаграм хуудсандаа хэдхэн нийтлэлтэй ч 6,000 гаруй дагагчтай болоод байна. Deadline хэвлэлийн мэдээлснээр энэхүү бүтээл ойрын хугацаанд нэлээд дуулиан шуугиан дэгдээх магадлалтай аж.

Xicoia-г үүсгэн байгуулагч Элин Ван дер Вельден есдүгээр сард хиймэл оюун ухаанаар бүтээгдсэн жүжигчдийн урлан байгуулснаа зарлаж, хамгийн анхны бүтээлүүдийнхээ нэгээр Тилли Норвудыгаа танилцуулжээ. Тэрээр мөн хиймэл оюун ухаанруу төвлөрөн ажилладаг Particle 6 продакшны ерөнхий захирлаар ажилладаг юм. Шинэ урлангийн зорилго нь кино, блог, видео тоглоом зэрэг салбарт гипер бодит дижитал оддын шинэ үеийг бий болгон, ашигтайгаар удирдах явдал гэж тодорхойлжээ.

Өнгөрсөн амралтын өдрүүдэд Швейцарийн Цюрих хотод болсон кино урлагийн салбарын чуулга уулзалтаар хэд хэдэн агентлаг Тилли Норвудын дүртэй холбоотой гэрээ байгуулахаар Xicoia-тай хэлэлцэж эхэлсэн байна. Гэвч энэ үйл явдал жүжигчдийн хүрээнд эсэргүүцэлтэй тулгарсан юм. Мелисса Баррера, Кирси Клемонс, Тони Коллетт зэрэг нэртэй жүжигчид цахим орчинд байр сууриа илэрхийлж, хэрэв студиуд зохиомол жүжигчидтэй хамтрах бол урланг бойкотлохоор уриалжээ.

Эсэргүүцлийн дараа Ван дер Вельден тайлбар хийхдээ:
“Тилли бол урлагийн бүтээл. Тэр хүчтэй маргаан дагуулж байгаагийн цаад учир нь урлагийн бүтээлийн нөлөө юм. Би ийм зохиомол зүйлийг хүнийг орлох хэрэгсэл гэж биш, харин театр, кино, уран зураг, хөгжим шиг өөрийгөө илэрхийлэх шинэ арга гэж харж байна” хэмээн онцолсон байна.

Харин жүжигчин Мара Уилсон өөрийн байр сууриа илэрхийлэхдээ: “Та энэ бүтээлдээ ашигласан олон бодит эмэгтэйчүүдийн талаар бодсон уу? Тэднээс хэн нэгнийг ажилд авах тухай толгойдоо ч оруулсангүй юу?” хэмээн шүүмжилжээ.