Авлигатай тэмцэх үндэсний хөтөлбөрийн Зорилго 4 буюу хувийн хэвшилд авлигыг үл тэвчих соёлыг төлөвшүүлэх ажлын хүрээнд Монголын Үндэсний Худалдаа Аж Үйлдвэрийн Танхимтай хамтран олон талт үйл ажиллагаа хэрэгжүүлж байна. Үүний нэг нь арга хэмжээний төлөвлөгөөний 4.1.3.3-д туссан “Компанийн дотоод орчинд шүгэл үлээх орчны талаарх өөрийн үнэлгээ хийх аргачлал”-ыг боловсруулан бизнес эрхлэгчдэд түгээх ажил юм.

Хэдийгээр Шүгэл үлээгчийн эрх зүйн байдлын тухай хууль УИХ-аар хараахан батлагдаагүй ч, гадаад, дотоодын хөрөнгө оруулагч, аж ахуйн нэгжүүд авлигаас ангид орчныг бүрдүүлэхэд анхаарч эхэлжээ. Тухайлбал, зарим гадаадын хөрөнгө оруулагчид Монголд хөрөнгө оруулахаас өмнө тухайн компанид авлигаас урьдчилан сэргийлэх, шүгэл үлээгчийг хамгаалах бодлого, журам хэрхэн төлөвшсөн талаар шууд асууж, шаарддаг болжээ.

Үүний зэрэгцээ үндэсний хэмжээний томоохон компаниуд дотооддоо шүгэл үлээгчийн бодлогыг хэрэгжүүлж, ажилтнуудаа урамшуулах, хамгаалах тогтолцоог бүрдүүлэхийг зорьж буй нь бизнесийн нэр хүнд, өрсөлдөх чадварт эерэгээр нөлөөлж байна. Мөн “ISO 37001 Авлигын эсрэг менежментийн тогтолцоо”-г нэвтрүүлэх ажлын хүрээнд шүгэл үлээгчийн эрхийг хамгаалах дүрэм журам боловсруулж, батлан хэрэгжүүлж эхэлжээ.

Авлигатай тэмцэх газар энэхүү чиглэлээр холбогдох аргачлал, зөвлөмжийг боловсруулан, бизнесийн орчинд шударга ёсыг бэхжүүлэх зорилгоор ажиллаж байна.

Эх сурвалж: Авлигатай Тэмцэх газар