Тайландын Сайд нарын танхим мягмар гарагт “Формула-1” авто уралдааныг Бангкок хотын гудамжнуудад зохион байгуулах тухай засгийн газрын хүсэлтийг албан ёсоор баталлаа. Энэхүү шийдвэр нь ирээдүйд уг уралдааныг Тайландад зохион байгуулах боломжийг нэмэгдүүлсэн чухал алхам болж байна.

Уг төслийн нийт өртөг ойролцоогоор 1.2 тэрбум ам.доллар байх бөгөөд спортын удирдах байгууллагууд хүсэлтийг баталсан тохиолдолд Тайландын нийслэлд 2028-2032 онд уралдааныг зохион байгуулах төлөвтэй байна. Тайландын Ерөнхий сайд Петхонгтан Чинаватра энэхүү төслийг урагшлуулахын тулд сүүлийн саруудад “Формула-1” группийн гүйцэтгэх захирал Стефано Доменикалитай олон удаа уулзаж, хамгийн сүүлд өнгөрсөн сард Монакод уулзсан юм.

Бангкокт уралдаан явуулах замын схемийг хараахан танилцуулаагүй байна. Гэвч засгийн газрын хэвлэлийн төлөөлөгч Жираю Хунгсубын мэдээлснээр, амралтын өдрүүдээр жуулчдыг ихээхэн татдаг хотын хойд хэсгийн Чатучак захын ойролцоох бүс уралдааны замд багтаж магадгүй ажээ.

Тайландын засгийн газар уг уралдааныг байгаль орчинд ээлтэй байдлаар явуулах санааг сурталчилж байгаа бөгөөд гран-при тэмцээн нь тус хаант улсад 600 сая ам.долларын үр өгөөжийг авчирна гэж мэдэгдэж байна. Одоогоор “Формула-1”-ийн 24 уралдааны хуваарийн ихэнх нь олон жилийн хугацаатайгаар батлагдсан байдаг ч хуваарьт өөрчлөлт оруулах боломж нээгдэх төлөвтэй байгаа юм. Стефано Доменикали өмнө нь Тайландыг нэгэн өрсөлдөгч болж магадгүй хэмээн хэлж байжээ.

“Формула-1” одоогоор Зүүн Өмнөд Азид зөвхөн нэг уралдааныг Сингапурт зохион байгуулдаг. Сингапур дахь уралдаан нь халуун, чийгшил ихтэй байдгаараа улирлын хамгийн хүнд уралдаануудын нэгд тооцогддог. Одоогийн байдлаар “Формула-1”-д Тайландын цорын ганц уралдаанч оролцож байгаа нь “Уильямс” багийн гишүүн, Лондонд төрсөн Алекс Албон юм.

Эх сурвалж: AFP