Авлигатай тэмцэх газрын Урьдчилан сэргийлэх, соён гэгээрүүлэх хэлтэс нь 2025 оны зургаадугаар сарын 2-6-ны өдрүүдэд Говь-Алтай, Дундговь аймаг болон Чингэлтэй дүүргийн холбогдох байгууллагуудад авлигын эрсдэлийг бууруулах, шалтгаан нөхцөлийг арилгах зорилгоор зөвлөмж хүргүүллээ. Зөвлөмжийг аймгийн Иргэдийн төлөөлөгчдийн хурлын дарга, Засаг дарга болон дүүргийн Эрүүл мэндийн төв зэрэг байгууллагуудад хүргэсэн бөгөөд төрийн үйлчилгээнд хүнд суртал, иргэдийг чирэгдүүлсэн байж болзошгүй дүрэм, журмыг сайтар нягтлан үзэх шаардлагатайг онцолсон байна.
Энэ хүрээнд “Авто зам, замын байгууламжийг хаах, замын чиглэл өөрчлөх журам”, “Ус хангамж, ариутгах татуургын төвлөрсөн сүлжээнд хэрэглэгчийг холбох техникийн нөхцөл олгох журам”, “Төлбөртэй тусламж үйлчилгээний журам” зэрэг нийтлэг хэрэглээ бүхий дүрэм, журмыг хянаж, сайжруулах чиглэлд анхаарсан байна.
Мөн тус хугацаанд авлигын эсрэг мэдлэг, ойлголтыг түгээх зорилгоор зохион байгуулсан сургалтад төрийн 9 байгууллагын 1332 албан тушаалтан хамрагдаж, хууль эрх зүйн мэдлэгээ бататгажээ.
Эх сурвалж: IAAC.mn
