2025 оныг Монгол Улсад хөгжлийн бэрхшээлтэй иргэдийн хөдөлмөр эрхлэлтийг дэмжих жил болгон зарласантай холбогдуулан орон нутгийн түвшинд бодит ажлууд эхэлж байна. Ховд аймагт хөгжлийн бэрхшээлтэй иргэдийн хөдөлмөр эрхлэлтийг нэмэгдүүлэх, тэднийг эдийн засгийн хувьд бие даасан байдал руу чиглүүлэх зорилгоор анх удаа гарааны бизнесийг дэмжих “Start up” уралдаан зарлажээ.

Ховд аймагт нийт 3000 орчим хөгжлийн бэрхшээлтэй иргэн бүртгэлтэй байдаг бөгөөд тэдний 10 орчим хувь нь тогтмол ажил хөдөлмөр эрхэлж байна. Тиймээс тус уралдаан нь эдгээр иргэдийн онцлог хэрэгцээнд нийцсэн ажлын байр бий болгох, бизнес санааг нь хэрэгжүүлэхэд шаардлагатай санхүүжилт олгох, цаашлаад нийгэм, эдийн засгийн идэвхтэй оролцоог дэмжих онцгой ач холбогдолтой арга хэмжээ болоод байна.

“Start up” уралдаанд:

• Хувиараа хөдөлмөр эрхэлдэг,

• Ажил хайж буй,

• Шинэлэг санаа бүхий, гарааны бизнесээ эхлүүлэхээр зорьж буй хөгжлийн бэрхшээлтэй иргэд оролцох боломжтой.

Уралдааны хүрээнд:

• Зургаадугаар сарын 24-нийг хүртэл бүртгэл үргэлжилнэ,

• Зургаадугаар сарын 25-нд оролцогчдод зориулсан сургалт, чадавхжуулах арга хэмжээ зохион байгуулагдана,

• Шилдэг хоёр оролцогчийг шалгаруулж, тус бүр 10 сая төгрөгийн санхүүжилт олгохоор төлөвлөсөн байна.

Төслийг Ховд аймгийн Засаг даргын Тамгын газар, Хөдөлмөр, халамжийн үйлчилгээний газар, Хөгжлийн бэрхшээлтэй хүний хөгжлийн төв хамтран зохион байгуулж буй бөгөөд уралдааны талаарх дэлгэрэнгүй мэдээллийг 77431220, 94058805, 95432727 дугаараар холбогдон авах боломжтой.

Эх сурвалж: Ховд аймгийн ЗДТГ, Хөдөлмөр, халамжийн үйлчилгээний газар.