Япон Улсад ур чадварын дадлагажигчаар ажиллаж буй найман монгол иргэн, мөн үндсэн ажилтнаар ажиллаж байгаа гурван иргэн нийлсэн нийт арван нэгэн хүн энэ оны дөрөвдүгээр сарын арван найманд Канүма хотод амьдардаг байрныхаа нэг өрөөнд танилцах зорилгоор нийллэг зохион байгуулжээ. Гэвч уг уулзалт согтууруулах ундаа хэтрүүлэн хэрэглэснээс болж маргаан болж, улмаар нэгнийхээ биед ноцтой гэмтэл учруулах хүртэл танхайрсан хэрэг гарсан байна.
Одоогийн байдлаар уг хэргийг Точиги мужийн Канүма хотын цагдаагийн газар шалгаж байгаа бөгөөд Монгол Улсаас Япон Улсад суугаа Элчин сайдын яам энэ талаар илгээгч болон хүлээн авагч байгууллагуудтай холбогдон хамтран ажиллаж байна. Япон Улсын Эрүүгийн хуулийн дагуу бусдын биед гэмтэл учруулах, танхайрах зэрэг үйлдэл нь таван зуун мянган иен хүртэл торгууль, арван тав хүртэлх жилийн хорих ял оногдуулах үндэслэл болдог хэмээн албаныхан мэдээлжээ.
Японд ял эдэлж буй монгол иргэдийн тоо жилээс жилд нэмэгдэж байгаа нь хариуцлагагүй, хууль зөрчсөн үйлдлүүдтэй холбоотой бөгөөд энэ нь хувь хүнээс гадна хамт олон, байгууллага, улмаар хоёр орны нэр хүндэд сөргөөр нөлөөлж болзошгүйг анхааруулж байна. Иймд Монгол Улсаас Япон Улсад ажиллаж буй иргэдийг хууль дүрэм, соёл заншлыг хүндэтгэж, ёс зүйтэй, хариуцлагатай байж, өөрийн болон бусдын амь нас, нэр төр, эрүүл мэндийг дээдэлж ажиллахыг Элчин сайдын яамнаас уриалжээ.
