АНУ, БНХАУ-ын өндөр албан тушаалтнууд Лондон хотноо худалдааны асуудлаарх хэлэлцээгээ өнөөдөр буюу 2025 оны зургаадугаар сарын 10-ны мягмар гарагт үргэлжлүүлж байна. Энэхүү хэлэлцээ нь хоёр улсын хоорондын эдийн засгийн харилцаа хурцадмал байдалд орсон, дэлхийн нийлүүлэлтийн сүлжээ хямрах эрсдэлтэй нөхцөлд чухал ач холбогдолтой гэж ажиглагчид үзэж байна.
Талууд газрын ховор элемент зэрэг стратегийн бүтээгдэхүүний экспортын хяналтад ахиц дэвшил гаргана гэж найдаж байгаа бөгөөд энэ нь авто машин, сансар судлал, хагас дамжуулагч болон батлан хамгаалахын салбаруудад шууд нөлөөлөх чухал асуудал болж байна. Өнгөрсөн сард Женевт болсон урьдчилсан тохиролцооноос хойш хоёр улсын харилцаанд эерэг хандлага бий болсон ч, Бээжингийн зүгээс чухал бүтээгдэхүүний экспортыг хязгаарласан нь Вашингтоны зүгээс эсэргүүцэлтэй тулгарч, талуудын хооронд шинэ маргаан үүсгээд байна.
Хэлэлцээний хүрээнд АНУ-ын талаас Сангийн сайд Скотт Бессент, Худалдааны сайд Ховард Лутник, Худалдааны төлөөлөгч Жеймисон Грир нар оролцож байгаа бол Хятадын төлөөлөгчдийг Төрийн зөвлөлийн Ерөнхий сайдын орлогч Хэ Лифэн ахалж байна. Х.Лутникийг хэлэлцээнд оролцуулсан нь газрын ховор элементүүдийн экспортын асуудал хэр чухал байгаагийн илэрхийлэл юм. Түүний агентлаг нь АНУ-ын экспортын хяналтыг хариуцдаг бөгөөд энэ удаагийн уулзалт Женевийн тохиролцоотой холбоотой санал зөрөлдөөнд төвлөрч байгаа аж.
Хоёр улсын хоорондын худалдааны харилцаа энэ үед төдийгүй дэлхийн эдийн засагт чухал нөлөөтэй. Хятадаас АНУ руу хийгдэж буй экспорт 2025 оны тавдугаар сард 34.5 хувиар буурсан нь “COVID-19” цар тахлын эхэн үеэс хойшхи хамгийн огцом бууралтад тооцогдож байна. Энэ нь хоёр орны худалдааны түншлэлд сэргэлт хэрэгтэй байгааг харуулж байна.
Лондон дахь уулзалт хоёр их гүрний харилцааг зөөлрүүлж, олон улсын хөрөнгө оруулагчдын итгэлийг сэргээхэд чиглэж байгааг шинжээчид онцолж байна. Түүнчлэн, хэлэлцээ АНУ-ын Ерөнхийлөгч Дональд Трамп болон Хятадын дарга Ши Жиньпин нарын утсаар ярьснаас ердөө дөрөв хоногийн дараа болж буй нь улс төр, эдийн засгийн талбарт хоёр талын хамтын ажиллагааг гүнзгийрүүлэх хүлээлт байгааг илтгэж байна.
Эх сурвалж: Reuters
