ОХУ-ын Ерөнхийлөгч Владимир Путин 2050 он хүртэлх Тэнгисийн цэргийн флотын хөгжлийн стратегийг баталсан тухай /RIA Novosti/ агентлаг мэдээллээ. Энэхүү стратеги төлөвлөлтийн баримт бичиг нь орчин үеийн Оросын түүхэнд анх удаа боловсруулагдаж, батлагдаж буйгаараа онцлог бөгөөд энэ талаар Ерөнхийлөгчийн туслах, Тэнгисийн коллегийн дарга Николай Патрушев “Аргументы и факты” сонинд өгсөн ярилцлагадаа дурджээ.
Патрушевын мэдээлснээр, стратеги боловсруулах шийдвэрийг өнгөрсөн оны долдугаар сард Кремльд болсон зөвлөгөөний үеэр гаргасан байна. Үүний дагуу Батлан хамгаалах яам гол бодлогын төслийг боловсруулж, холбооны агентлагууд, салбарын байгууллагуудын саналуудыг харгалзан Тэнгисийн коллеги нарийвчлан боловсруулж Ерөнхийлөгчид танилцуулжээ. Эцэслэн батлах шийдвэрийг тавдугаар сарын 30-нд В.Путин гаргасан байна.
Стратегийн баримт бичигт:
-
Дэлхийн цэрэг-улс төрийн нөхцөл байдалд хийсэн гүнзгий дүн шинжилгээ
-
Зэвсэгт мөргөлдөөн гарах магадлалтай бүс нутгууд, түүний хэлбэр, онцлог
-
Тэнгисийн цэргийн хүчинтэй гүрнүүдийн чадавх, нөөц бололцооны харьцуулалт
-
Украины дайны явцад Оросын Тэнгисийн цэргийн флот олж авсан сургамж, туршлагууд
зэргийг багтаасан байна.
Тус стратеги нь Оросын Тэнгисийн цэргийн флотыг зөвхөн батлан хамгаалах үүрэгтэй хүчин байхаас гадна, геополитикийн нөлөөллийн томоохон хэрэгсэл болгон дэлхийн түвшинд өрсөлдөхүйц чадамжтайгаар хөгжүүлэх зорилго тавьж байгааг тус баримт бичиг онцолж байгаа аж. Цаашид тус стратегийн хүрээнд технологи, судалгаа, усан онгоцны үйлдвэрлэл, эрсдлийн хариу арга хэмжээ зэрэг олон чиглэлд хамарсан бодлого, хөрөнгө оруулалтын хөтөлбөрүүд хэрэгжүүлэхээр төлөвлөжээ.
Эх сурвалж: RIA Novosti
