Улаанбаатар хот орчимд бамбай хоншоорт болон рашааны гэх хоёр зүйлийн могой тархан амьдардаг бөгөөд дулааны улирал эхэлснээр могойн дуудлагын тоо нэмэгдэх хандлагатай байгааг холбогдох байгууллагаас мэдээллээ. Ялангуяа бамбай хоншоорт могой нь хортой могойн төрөлд хамаардаг тул иргэдийн сонор сэрэмж, хариу арга хэмжээ онц чухал байна.

Бамбай хоншоорт могой нь ихэвчлэн хул шаргал эсвэл хар хүрэн өнгөтэй, нуруу болон сүүлээрээ хөндлөн цагаан судалтай. Сүүл нь богино, нүд нь босоо хүүхэн хараатай бөгөөд хамрын хоёр сүвний хооронд гүн хонхортой байдаг тул зарим үед хамрын дөрвөн сүвтэй мэт харагддаг нь танихад хялбар онцлог юм.

Сүүлийн үед могой хүүхдийн тоглоомын талбай, ногоон байгууламж, айлын хашаа, орон сууцны гадаа болон авто зогсоол, автограш зэрэг газраас олдох нь нэмэгджээ. Хур бороо ихтэй үед үерийн усаар дамжин ирэх, мөн идэш тэжээл хайн хотын захын бүс рүү нэвтрэх нь түгээмэл байна. Хотын төв хэсэгт хөдөө орон нутгаас ирсэн тээврийн хэрэгслийн моторын хэсэг, ачаа тээшээр дамжин ирэх тохиолдол ч байгааг онцлон анхааруулж байна.

Мэргэжлийн байгууллагуудын мэдээлснээр, суурьшлын бүсэд могойн талаарх дуудлага нэмэгдэж байгаа тул дараах зөвлөмжийг өгч байна:

• Могой таарсан тохиолдолд ажлын цагаар Нийслэлийн Байгаль орчны газрын 72720303, ажлын бус цагаар Нийслэлийн Шуурхай удирдлага зохицуулалтын төвийн 11-310005 дугаарын утсаар яаралтай мэдээлэл өгнө.

• Могойг бие даан устгах, хөөх оролдлого хийхгүй байх,

• Мэргэжлийн хүмүүс иртэл могойн байршлыг анхааралтай ажиглах,

• Хатгуулсан тохиолдолд яаралтай эмнэлгийн байгууллагад хандах шаардлагатай.

Хот суурин газрын орчимд амьдрах иргэд байгаль, ан амьтны амьдрах орчныг хамгаалах үүднээс болгоомжтой, хариуцлагатай хандлага гаргах хэрэгтэйг Нийслэлийн Байгаль орчны газраас уриаллаа.

Эх сурвалж: Нийслэлийн Байгаль орчны газар