Газын зурвас руу хүмүүнлэгийн тусламж хүргэхээр олон улсын усан хилд явж байсан “Мадлин” хөлөг онгоцыг Израилын арми саатуулсан тухай мэдээллийг “Эрх чөлөөний флот” эвсэл (FFC) албан ёсоор баталлаа. Энэхүү хөлөг онгоц нь энгийн иргэдээс бүрдсэн сайн дурынхны багтай, хүүхдийн сүү, хоол хүнс, эм тариа зэрэг Газын энгийн иргэдэд нэн шаардлагатай тусламж тээвэрлэж явсан байжээ.

FFC-ээс мэдээлснээр Израилын цэргүүд хөлөг онгоц руу хууль бусаар нэвтэрч, багийн гишүүдийг хүч хэрэглэн саатуулсан бөгөөд ачааг нь хураан авсан байна. Тус эвслийн зохион байгуулагч, хүний эрхийн өмгөөлөгч Хувайда Арраф “Израил тусламжийг саатуулах эрхгүй” хэмээн мэдэгдэж, Олон улсын шүүхийн Газын зурваст хүмүүнлэгийн тусламжийг саадгүй нэвтрүүлэхийг шаардсан тушаалуудыг зөрчиж буйг онцолжээ.

Харин Израилын Гадаад хэргийн яамнаас гаргасан мэдэгдэлд “Мадлин” хөлөг онгоцыг аюулгүй байдлын үүднээс саатуулан эргээ авчран шалгаж буйг тайлбарласан. Мөн хөлөг онгоцонд тээвэрлэж явсан тусламжийн хэмжээ маш бага байсан, харин Израил сүүлийн хоёр долоо хоногт Газын зурвас руу 1200 гаруй тусламжийн машин нэвтрүүлсэн хэмээн онцолжээ.

Мөн тус яамны мэдээлснээр, уур амьсгалын өөрчлөлтийн эсрэг тэмцэгч Грета Тунберг, бусад зорчигчид хэвлэл мэдээллийн анхаарлыг татах зорилготойгоор ийм үйлдэл хийсэн гэж үзэж байна. Тэднийг ойрын хугацаанд эх орон руу нь буцаахаар ажиллаж байгаа тухай мэдэгдсэн байна.

Энэхүү үйл явдал нь Газын зурваст үүсээд буй хүмүүнлэгийн хямрал, олон улсын хууль эрх зүйн орчны талаар дахин анхаарлын төвд авчраад байна.

Эх сурвалж: DW, FFC, Израилын Гадаад хэргийн яам