Засгийн газрын хэрэгжүүлэгч агентлаг болох Боловсролын ерөнхий газар, Эрүүл мэндийн яамтай хамтран бага насны хүүхдийг ахуйн орчин дахь түлэгдэлт болон бусад ослоос урьдчилан сэргийлэх зорилго бүхий зөвлөмжийг олон нийтэд хүргэж байна. Энэхүү мэдээллийг гэртээ бага насны хүүхэдтэй өрх бүр анхааралтай судалж, өдөр тутмын ахуйн хэрэглээндээ мөрдөх нь нэн чухал гэж холбогдох байгууллагууд онцолжээ.

Зөвлөмжийн хүрээнд хүүхдийг тэвэрч байх үед халуун хоол, цай уух, халуун савтай зүйлийг авч явахгүй байхыг онцгойлон анхааруулсан байна. Мөн халуун хоол, уух зүйлсийг хүүхэд хүрч чадахгүй өндөрт байрлуулах, ширээний ирмэг дээр байрлуулахгүй байх шаардлагатай гэжээ.

Үүнээс гадна цахилгаан хэрэгсэл, индүү, зуух зэрэг халуун төхөөрөмжөөс хүүхдийг хол байлгах, тэдгээрийн тагийг байнга түгжиж, халуун үед хүрч очихоос сэргийлэх хэрэгтэй. Хутга, хайч зэрэг хурц иртэй багаж, цахилгааны гэмтэлтэй утас, хүнд сав суулга зэрэг нь хүүхдэд ноцтой гэмтэл учруулах эрсдэлтэй тул гар хүрэх боломжгүй газар хадгалах нь зүйтэй гэж мэргэжилтнүүд зөвлөж байна.

Мөн гэр ахуйн хэрэглээнд түгээмэл байдаг ширээний бүтээлэг нь хүүхэд татахад ширээн дээрх зүйлсийг хамтад нь унагах аюултай учраас ашиглахгүй байх нь илүү аюулгүй сонголт болохыг анхааруулжээ.

Иймд эцэг эх, асран хамгаалагчид ахуйн орчны аюулгүй байдлыг хангаж, хүүхдийг болзошгүй ослоос хамгаалах нь хамгийн чухал үүрэг болохыг мэргэжлийн байгууллагууд сануулж байна.

Эх сурвалж: Боловсролын ерөнхий газар