АНУ-ын Калифорни муж улсын Лос-Анжелес хотод хууль бус цагаачдыг баривчлах ажиллагааг эсэргүүцсэн өргөн хүрээтэй жагсаал болсон тухай TASS агентлаг мэдээллээ. Жагсагчид АНУ-ын Цагаачлал, гаалийн хяналтын алба (ICE)-ны саатуулах төвийг бүсэлж, замын хөдөлгөөнд саад учруулан, хууль сахиулах байгууллагын ажилтнууд руу чулуу, петард шидсэн байна.

Цагаан ордны Тамгын газрын орлогч дарга Стивен Миллер уг жагсаалыг "хууль тогтоомж болон бүрэн эрхт байдлын эсрэг бослого" гэж тодорхойлон "X" нийгмийн сүлжээнд мэдэгдэл нийтэлжээ. Тэрбээр Лос-Анжелес хотын Цагдаагийн газрын дарга Жим Макдоннеллийг "иргэдийн эрхийг хамгаалахын оронд хууль бус үйлдлийг өөгшүүлж байна" хэмээн шүүмжилсэн байна. Цагдаагийн дарга албан ёсоор “олноор нь албадан гаргах ажиллагаанд цагдаа нар оролцохгүй” хэмээн мэдэгдсэн нь шүүмжлэл дагуулжээ.

Ерөнхийлөгч Дональд Трамп “Truth Social” хаягтаа Калифорни мужийн захирагч Гэвин Ньюсон, Лос-Анжелес хотын дарга Карен Басс нарыг ажлаа хийж чадахгүй байна гэж шүүмжилж, “холбооны Засгийн газар үүссэн нөхцөл байдлыг хянахын тулд зайлшгүй оролцох шаардлагатай болсон” гэж бичжээ. Цагаан ордны хэвлэлийн нарийн бичгийн дарга Кэролайн Ливитт “АНУ-ын хууль, журмыг зөрчигчдийг тэвчихгүй, аюул учруулж буй бүх хууль бус цагаачдыг албадан гаргана” гэж X сүлжээнд бичсэн байна.

АНУ-ын хилийн аюулгүй байдал, цагаачлалын асуудал эрхэлсэн төлөөлөгч Томас Хоман “Fox News” сувгаар мэдэгдэхдээ, Ерөнхийлөгчийн даалгавраар Үндэсний гвардийн 2000 алба хаагчийг Лос-Анжелест байрлуулах шийдвэр гаргасан гэв. Цагаан ордны хэвлэлийн албанаас нийтэлсэн мэдэгдэлд дурдсанаар, энэ нь эмх замбараагүй байдлыг хязгаарлах зорилготой гэнэ.

Америкийн хэвлэлүүдийн мэдээлснээр, хууль бус цагаачдыг баривчлах ажиллагаа өнгөрсөн баасан гарагт эхэлж, бямба гаргийн орой гэхэд хамгийн багадаа 44 хүн баривчлагдсан байна. Үүний дараа тус хотод хууль сахиулах ажиллагааг эсэргүүцсэн жагсаал өрнөж, зарим оролцогчид ICE-ийн ажилд саад учруулахыг оролдсон нь нөхцөл байдлыг хурцатгасан юм.

Эх сурвалж: TASS