Энэтхэгийн хойд нутгийн Жамму ба Кашмир мужид орших Чинаб голын дээгүүр баригдсан дэлхийн хамгийн өндөр төмөр замын гүүрийг албан ёсоор ашиглалтад орууллаа. Энэхүү түүхэн нээлтийг тус улсын Ерөнхий сайд Нарендра Моди биечлэн оролцож, гүүрээр зорчих хөдөлгөөнийг албан ёсоор эхлүүлсэн байна.

Чинаб голын дээгүүрх энэ байгууламж нь 359 метрийн өндөртэй бөгөөд усны дундаж түвшнээс тооцвол 322 метрээс доошгүй. Энэ нь уг гүүрийг төмөр замын гүүрүүдийн дотроос дэлхийд хамгийн өндрөөр нэрлэгдэх үндэслэл болж байна. Нийт 1.3 км урттай гүүрийн гулдан хэсэг 467 метр урттай бөгөөд дэлхийд хамгийн уртад тооцогдох кран ашиглан угсарсан нь инженерийн томоохон амжилт хэмээгдэж байна.

Ерөнхий сайд Моди энэхүү нээлтийн үеэр “Энэ гүүр нь зөвхөн Жамму ба Кашмирыг Энэтхэгийн бусад нутагтай төмөр замаар холбож буй хэрэг биш. Харин ч бүс нутгийн тээврийн дэд бүтэц, аялал жуулчлал, эдийн засгийн хөгжилд хүчтэй түлхэц өгөх бөгөөд энэхүү бүтээн байгуулалт нь Энэтхэгийн ард түмний эв нэгдэл, хүсэл тэмүүллийг илэрхийлж байна” хэмээн онцолжээ.

Газар хөдлөлт их тохиолддог, хүчтэй салхитай уулархаг бүс нутагт баригдсан уг гүүр нь секундэд 74 метрийн салхи, хүчтэй чичиргээг тэсвэрлэх чадвартай байхаар төлөвлөгдөж, баригджээ. Эхэндээ 2019 онд ашиглалтад оруулахаар төлөвлөж байсан ч коронавирусний цар тахал болон бусад нөхцөл байдлаас шалтгаалан хойшлогдсон байна.

Сүүлийн жилүүдэд Энэтхэгийн Засгийн газар тус бүс нутагт тээврийн дэд бүтцийн шинэчлэлд онцгой анхаарч ажиллаж байгаа. Ийнхүү дэд бүтэц хөгжсөнөөр Кашмир дахь нийгэм, эдийн засгийн байдал сайжирч, зэвсэгт мөргөлдөөн, хурцадмал нөхцөл байдал намжина хэмээн найдаж буйгаа эрх баригчид илэрхийлсэн юм.

Эх сурвалж: Hindustan Times.