Норвегийн хууль тогтоогчид жуулчдын хэт төвлөрлөөс үүдэх дарамтыг бууруулах, аялал жуулчлалын дэд бүтцийг сайжруулах зорилгоор жуулчдын татварын тухай хуулийг баталлаа. Сүүлийн жилүүдэд тус улс руу зорчих жуулчдын тоо эрс нэмэгдэж, зарим бүс нутгийн оршин суугчдын хувьд хүндрэл дагуулаад буйг анхааран энэхүү шийдвэрийг гаргасан байна.

Шинээр батлагдсан хуулийн дагуу Норвегид түр хугацаагаар байрлах жуулчдаас гурван хувийн татвар ногдуулна. Мөн аяллын хөлөг онгоц ихээр зогсдог, байгаль орчинд эмзэг фиордууд бүхий бүс нутгуудад энэ татварыг хөлөг онгоцнуудад ч мөн адил хамааруулах хувилбар яригдаж байгаа аж.

Норвегийн үзэсгэлэнт байгаль, ялангуяа тэнгисийн ус хадат газарт гүн нэвчин орсон фиордууд нь дэлхий дахины аялагчдын сонирхлыг татсаар байгаа юм. 2023 онд тус улсад бүртгэгдсэн 38.4 сая өдрийн аялал жуулчлалын тохиолдлын 12 сая гаруйг гадаадын жуулчид эзэлжээ. Гэвч ингэхдээ зарим жижиг хот, суурингуудын автомашины зогсоол, нийтийн бие засах газар зэрэг үндсэн үйлчилгээний байгууламжууд ачааллаа дийлэхээ больж, орон нутгийн иргэдийн бухимдлыг төрүүлээд байгаа юм.

Иймд татвараас төвлөрсөн орлогыг зөвхөн аялал жуулчлалтай холбоотой дэд бүтцийн хөрөнгө оруулалтад зориулах бөгөөд үүгээр дамжуулан жуулчдын ая тухтай байдал, орон нутгийн иргэдийн амгалан орчинг зэрэгцүүлэн хангахыг зорьж байна.

Эх сурвалж: AFP