АНУ-ын Ерөнхийлөгч Дональд Трамп болон БНХАУ-ын дарга Ши Жиньпин нар утсаар яриа өрнүүлж, хоёр орны худалдааны хэлэлцээртэй холбоотой асуудлыг дэлгэрэнгүй хэлэлцсэн талаар Трамп пүрэв гарагт “Truth Social” нийгмийн сүлжээндээ мэдэгдлээ. Түүний хэлснээр, 90 минут үргэлжилсэн ярианы үеэр талууд олон чухал асуудал дээр нааштай, үр дүнтэй байр сууринд хүрчээ.

Ши Жиньпин Ерөнхийлөгч Трамп болон тэргүүн хатагтайг Хятадад айлчлахыг найрсгаар урьсан бөгөөд Трамп ч мөн Ши болон түүний гэргийг АНУ-д айлчлахыг урьсан байна. “Хоёр том гүрний удирдагчийн хувьд энэ бол хэн хэнд нь тэсэн ядан хүлээж буй айлчлал” гэж Трамп онцолжээ.

Хоёр орны эдийн засгийн уур амьсгалыг сайжруулах чиглэлээр ойрын хугацаанд өндөр түвшний уулзалт хийхээр төлөвлөж байгаа бөгөөд АНУ-ын талаас Сангийн сайд Скотт Бессент, Худалдааны сайд Ховард Лутник, Худалдааны төлөөлөгч, Элчин сайд Жеймисон Грир нар оролцоно гэж Ерөнхийлөгч мэдээлжээ.

Утсаар ярих үеэр Орос, Украин, Иран зэрэг геополитикийн асуудлыг хөндөөгүй бөгөөд ярианы гол агуулга худалдааны бодлогын зохицуулалтад төвлөрсөн байсныг Трамп онцолсон байна.

Энэхүү яриа нь хоёр орны хооронд худалдааны дайны хурцадмал байдлыг намжаасан сүүлийн үеийн алхмуудын нэг юм. Өнгөрсөн сард талууд бие биедээ ногдуулсан өндөр татварыг түр хугацаанд бууруулахаар тохиролцсон. АНУ Хятадын бараанд ногдуулсан 145 хувийн татварыг 90 хоногийн хугацаанд 30 хувь болгон бууруулсан бол Хятадын тал АНУ-ын бараанд ногдуулсан 125 хувийн татварыг 10 хувь болгон бууруулсан байна.

Эх сурвалж: Reuters.