Европын Комисс энэ долоо хоногийн лхагва гарагт Болгарын еврог гүйлгээнд нэвтрүүлэх шийдвэрийг дэмжиж, тус улс нэгдсэн мөнгөн тэмдэгтэд шилжихэд эдийн засгийн хувьд хангалттай бэлтгэгдсэн гэж үзэж байгаагаа мэдэгдлээ. Инфляц буурсны дараа Болгар улс ЕХ-ны 21 дэх евро бүсийн гишүүн болох нөхцөлийг хангасан талаар тайланд дурджээ.

Болгар улс 2007 онд Европын Холбоонд элссэн бөгөөд анх 2024 онд еврог нэвтрүүлэхээр төлөвлөж байсан. Гэвч тухайн үеийн инфляц 9.5 хувьд хүрсэн нь төлөвлөгөөг хойшлуулах шалтгаан болсон юм. Харин Европын Комиссын шинэ тооцооллоор, Болгарын инфляц 2025 онд 3.6 хувь болж буурч, 2026 онд 1.8 хувь болох хандлагатай байна.

Европын Төв банк ч мөн Болгарын эдийн засгийн бэлтгэл хангалттай байгаа хэмээн үнэлсэн бөгөөд ийнхүү тус улс 2026 оны нэгдүгээр сарын 1-нээс еврог нэвтрүүлэх бүрэн боломжтой болж байгаа юм.

Эх сурвалж: DW