Америкийн хиймэл оюуны чип үйлдвэрлэгч “Nvidia” компани зах зээлийн үнэлгээгээр “Microsoft”-ыг гүйцэж, дэлхийн хамгийн үнэ цэнтэй компанийн байр суурийг дахин эзэллээ. Мягмар гарагт тус компанийн хувьцааны ханш 3 хувиар өсч, 141.40 ам.долларт хүрсэн нь зах зээлийн үнэлгээг нь 3.45 их наяд ам.долларт хүргэсэн байна. Үүний зэрэгцээ “Microsoft”-ын үнэлгээ ижил хугацаанд 3.44 их наяд ам.доллар байжээ.

“Nvidia” 2024 оны эхний хагасаас хойш “Apple” болон “Microsoft”-той ээлжлэн дэлхийн хамгийн үнэ цэнтэй компаниудын жагсаалтыг тэргүүлж байгаа бөгөөд энэ удаагийн өсөлт нь тус компанийн хиймэл оюуны салбар дахь давамгайлалтай холбоотой юм. “ChatGPT” зэрэг хиймэл оюуны системүүдийг ажиллуулахад шаардлагатай өндөр хүчин чадал бүхий график процессор чипүүдийг (GPU) Nvidia үйлдвэрлэдэг бөгөөд энэ нь түүнийг салбартаа бараг цорын ганц гол ханган нийлүүлэгч болгож байна.

OpenAI-гаас гадна “Microsoft”, “Meta”, “Google”, “Amazon”, “Oracle”, Илон Маскийн “xAI” зэрэг технологийн аваргууд хиймэл оюуны дэвшлийг бүтээхийн тулд Nvidia-ийн чипүүдийг идэвхтэй худалдан авч байгаа нь компанийн үнэлгээнд хүчтэй нөлөөлж байгаа юм.

Зөвхөн сүүлийн нэг сарын хугацаанд Nvidia-ийн хувьцааны ханш 24 орчим хувиар өссөн нь зах зээлийн найдвар, технологийн хандлага хаашаа чиглэж байгааг илтгэж байна. Хиймэл оюун ухаан, дата төв, гүнзгий сургалт зэрэг салбаруудын хурдацтай өсөлт Nvidia-г дэлхийн эдийн засгийн шинэ удирдагчдын нэг болгон тодруулж байна.

Эх сурвалж: CNN, Bloomberg, CNBC