ХБНГУ-ын Засгийн газар Монгол Улсын Засгийн газрын шинэчлэлийн зорилтыг дэмжихэд нийт 43.1 сая еврогийн санхүүжилт олгоно. 

Тодруулбал, уламжлалт хамтын ажиллагааны чиглэл болох биологийн олон янз байдал, байгаль хамгаалал, боловсрол, хөдөлмөр эрхлэлт, уур амьсгал, эрчим хүчний салбарыг хамруулж байгааг ЭЗХЯ мэдээлсэн юм.

ХБНГУ-ын Засгийн газар хоорондын Хөгжлийн бодлогын хамтын ажиллагааны ээлжит хэлэлцээг Улаанбаатар хотноо зохион байгуулж, Монгол талаас ЭЗХЯ-ны Төрийн нарийн бичгийн дарга И.Батхүү, Герман талаас Монгол Улсад суугаа Онц бөгөөд Бүрэн эрхт Элчин сайд Хэльмут Рудольф Кулитц, Холбооны Эдийн засгийн хамтын ажиллагаа, хөгжлийн яамны Зүүн, Төв Азийн хэлтсийн дарга Яннис Неопиту тэргүүлэв. Хэлэлцээ нь Монгол Улс, ХБНГУ стратегийн түншлэлийн түвшинд хүрсэнтэй холбоотой хөгжлийн хамтын ажиллагааг шинэ шатанд гаргах талаар талууд санал нэгдсэнээрээ онцлог байв.

Монгол талаас ЭЗХЯ, ГХЯ, ХЗДХЯ, Сангийн яам, Боловсролын яам, БОУАӨЯ-ны 17, Германы талаас Холбооны Эдийн засгийн хамтын ажиллагаа, хөгжлийн яам (BMZ) Германы олон улсын хамтын ажиллагааны нийгэмлэг (GIZ), СБЗБ (KfW), Геошинжлэх ухаан, байгалийн нөөцийн холбооны хүрээлэн (BGR)-ийн 14 төлөөлөл оролцлоо.

Германын Засгийн газар Монгол Улсын эдийн засгийг төрөлжүүлэх бодлогыг эрчимжүүлэхэд дэмжлэг үзүүлж, Засгийн газрын урт, дунд хугацааны хөгжлийн бодлогын хөтөлбөрт тусгасан үйл ажиллагааг хэрэгжүүлэх, хөрөнгө оруулалт, бизнесийн таатай орчин бүрдүүлэхэд хамтран ажиллахаа илэрхийлжээ. Цаашид Германы Засгийн газрын санхүүжилтийн шинэ арга хэрэгсэл, хөрөнгө оруулалтын механизмыг Монголд нэмэх, хоёр талын бизнес, хувийн хэвшлийн хамтын ажиллагааг өргөжүүлэхэд анхаарахаар тохиролцжээ.