Энэтхэгийн Банглор хотод “FIBA Asia Mid-Term Assembly”-д эх орноо төлөөлөн МСБХ-ны генсек С.Төгсжаргал оролцов.

Чуулганаар Азийн сагсан бөмбөгийн холбооны 2023-2025 оны үйл ажиллагааны тайланг танилцуулах үеэр “Монгол Улс өсвөр үе болон эрэгтэй эмэгтэй eFIBA, 3х3-ын тив, дэлхий, олон улсын тэмцээнүүдийг амжилттай зохион байгуулж, идэвхтэй оролцсон орнуудын нэг” хэмээн онцолжээ. Мөн 3х3 төрлийг хөгжүүлэх талаарх сургалт, хэлэлцүүлгээр Монгол Улсын туршлага, амжилтыг дурдаад Монголын охидын АНУ-ын багийг хожсон түүхэн ялалт нь олон улсын сагсан бөмбөгийн хүрээнд “Боломжгүй зүйл гэж үгүй” гэсэн итгэлийг түгээсэн онцгой үйл явдал хэмээн үнэлсэн байна. Чуулганы нээлтийн үеэр ФИБА-гийн ерөнхийлөгч Шэйх Сауд Али Ал Тани Монгол Улсад FIBA U16 Asia Cup болон FIBA 3x3 World Cup-ийг амжилттай зохион байгуулсанд онцгойлон талархал илэрхийлж, Монголын сагсан бөмбөгийн холбоонд баяр хүргэсэн аж. Түүнчлэн чуулганд оролцогчид ч манай улсыг “Олон улсын тэмцээнүүдийг мэргэжлийн өндөр түвшинд зохион байгуулдаг, багууд нь амжилттай өрсөлддөг, дотоодын лиг нь идэвхтэй хөгжиж буй” хэмээн өндрөөр үнэлсэн байна. Түүнчлэн энэ удаагийн чуулганаар Монголын сагсан бөмбөгийн холбооныхон ФИБА-гийн хоёр шинэ төслийг эх орондоо хэрэгжүүлэхээр тохиролцжээ.