АНУ-ын Ерөнхийлөгч Дональд Трамп аюулгүй байдалтай холбоотой эрсдэлүүдийг үндэслэн 19 орны иргэдийг АНУ-д нэвтрэхийг хориглох тухай тунхаглалд лхагва гаргийн орой гарын үсэг зурлаа. Энэхүү шийдвэр зургаадугаар сарын 9-ний өдрийн 12:01 цагаас эхлэн хүчин төгөлдөр хэрэгжиж эхлэх юм.

Шинэ хоригийн дагуу дараах 12 орны иргэд АНУ-ын хилээр бүрмөсөн нэвтрэх боломжгүй болох аж:

• Афганистан

• Мьянмар

• Чад

• Бүгд Найрамдах Конго Улс

• Экваторын Гвиней

• Эритрей

• Хаити

• Иран

• Ливи

• Сомали

• Судан

• Йемен

Мөн Бурунди, Куба, Лаос, Сьерра-Леон, Того, Туркменистан, Венесуэл зэрэг долоон орны иргэдэд тодорхой ангилалд хэсэгчилсэн хязгаарлалт үйлчилнэ.

Гэсэн ч АНУ-д хууль ёсны байнгын оршин суугчид, хүчинтэй виз эзэмшигчид, богино хугацааны зөвшөөрөлтэй зорчигчид болон АНУ-ын үндэсний ашиг сонирхлыг төлөөлөн зорчиж буй иргэдэд уг хориг хамаарахгүй ажээ.

Цагаан ордны мэдээлснээр уг хоригийг Колорадо муж улсын Боулдер хотод гарсан антисемит шинжтэй халдлагын дараа эцэслэн баталсан байна. Ерөнхийлөгч Трамп өмнө нь ижил агуулгатай шийдвэр гаргах талаар эргэцүүлж байсан ч уг халдлага түүний шийдвэрийг түргэсгэжээ.

Трамп өөрийн дүрс бичлэгтээ “манай улс руу хор хөнөөлтэй зорилготой гадаадын этгээдүүд нэвтрэхээс урьдчилан сэргийлэх” нь үндэсний аюулгүй байдлын нэг хэсэг бөгөөд сонгуулийн кампанит ажлын үеэр өгсөн амлалтаа биелүүлж байгаагаа онцолсон. Түүнчлэн дэлхий даяар үүсч буй шинэ аюул заналхийлэлтэй уялдуулан хоригт шинээр улс орнуудыг нэмэх боломжийг нээлттэй үлдээж буйгаа илэрхийлжээ.

Эх сурвалж: CNN, White House Press Office