АНУ-ын Ерөнхийлөгч Дональд Трамп болон ОХУ-ын Ерөнхийлөгч Владимир Путин нар лхагва гарагт утсаар ярьж, цаг гаруй хугацаанд дэлхийн хоёр том гүрний хувьд анхаарал татаж буй асуудлуудаар санал солилцжээ. Ярианы гол сэдвүүдийн нэг нь Украин Оросын нисэх онгоцны буудлууд руу хийсэн довтолгоо байсан бөгөөд Трамп энэ талаар “үр өгөөжтэй яриа болсон ч шууд энх тайванд хүргэх хэлэлцээ биш” хэмээн тодорхойлсон байна.

Түүний мэдэгдснээр, Владимир Путин Украины цохилтод хариу арга хэмжээ авна гэдгээ онцолжээ. Мөн хоёр удирдагч Ираны цөмийн хөтөлбөрийн талаар ярилцсан бөгөөд Трамп “Иран улс цөмийн зэвсэгтэй болох ёсгүй” гэдэг байр сууриа дахин илэрхийлж, Путин ч энэ асуудалд дэмжлэг үзүүлж магадгүй гэсэн найдвар илэрхийлжээ. ОХУ Ираны талтай хийх хэлэлцээнд оролцох боломжтой талаар Путин санал гаргасан бөгөөд Трамп “түүний оролцоо хурдан шийдэлд хүргэхэд тусалж болзошгүй” гэж үзсэн байна.

Энэхүү яриа нь Владимир Путин Засгийн газрын хуралдааны үеэр Украины Ерөнхийлөгч Владимир Зеленскийтэй хэлэлцээ хийхээс татгалзаж, гал зогсоох нөхцөлгүй хэлэлцээнд оролцохоос цааргалсан мэдэгдлийн дараахан болсон байна. Хэдий ийм байр суурь илэрхийлсэн ч Путин АНУ-ын Ерөнхийлөгчтэй холбоо барьж, яриа хэлэлцээний суваг нээлттэй хэвээр байгааг харуулсан гэж ажиглагчид дүгнэж байна.

Түүнчлэн Путиний туслах Юрий Ушаков ярианы талаар мэдээлэхдээ, Украины тал Москватай хийж буй хэлэлцээг тасалдуулах оролдлого хийсэн ч Оросын тал "өдөөн хатгалгад автаагүй" гэдгийг Путин онцлон дурдсан гэжээ.

Үүний зэрэгцээ Украины Ерөнхийлөгчийн Тамгын газрын дарга Андрей Ермак тэргүүтэй төлөөлөгчид Вашингтонд айлчилж, АНУ-аас үзүүлэх цэргийн тусламжийг нэмэгдүүлэх, ОХУ-д тавьсан хориг арга хэмжээг чангатгах талаар яриа хэлэлцээ хийж байгаа юм.

Трамп, Путин нар өмнө нь гурван удаа утсаар ярьж байсан бөгөөд энэ удаагийн яриа нь дөрөв дэх нь болж байна.

Эх сурвалж: Svoboda.org