АНУ-ын Ерөнхийлөгч Дональд Трамп үндэсний аюулгүй байдлын үүднээс 12 орны иргэдийн АНУ-д нэвтрэхийг хориглосон шинэ зарлигт гарын үсэг зурлаа. Энэхүү шийдвэрт Куба орсон нь Флорида муж дахь олон Куба-Америкчуудын дунд эсэргүүцэл, бухимдал үүсгэж эхэлжээ.

Харин Кубын засгийн газар өөрийгөө “терроризмыг дэмжигч улс” гэж ангилсан шийдвэрийг эрс эсэргүүцэж, энэ нь шударга бус бөгөөд олон улсын санхүүгийн системд Кубыг тусгаарлах замаар эдийн засгийг нь бүслэн хаах оролдлого гэж мэдэгдсэн байна. Хэдийгээр Кубын дарангуйллын эсрэг байр суурьтай олон Куба-Америкчууд Трампыг дэмжиж ирсэн ч, тус улсаас хууль ёсоор АНУ-д ирэх гэж буй энгийн Куб иргэдийн эрх хязгаарлагдаж байгаа нь Майамигийн зарим хэсэгт дургүйцэл төрүүлж байна.

Үүнээс гадна Трампын гаргасан өөр нэгэн шийдвэр нь Харвард их сургуулийг чиглэсэн байна. Гадаадын оюутнуудад олгодог визийн бодлогыг чангатгаж, Харвардын хөтөлбөрт хамрагдах гадаад оюутнуудыг нарийн шалгуураар нэвтрүүлэх болсныг зарлалаа. Цагаачлалын системд Харвард хангалттай хяналт тавьж чадахгүй байна гэж Трампын засаг захиргаа үзсэн бөгөөд уг их сургуулийг Хятадын Коммунист намын нөлөөнд автсан гэж үзэж буйгаа илэрхийлжээ.

Харин Ардчилсан намын зүгээс уг хоригийг "ялгаварлан гадуурхсан, Америкийн нэр хүндийг дэлхийд гутаасан алхам" гэж дүгнэж, Трампын энэхүү бодлого нь АНУ-ын үндсэн зарчмуудыг зөрчиж буй хэрэг хэмээн шүүмжилж байна.

Шинэ хоригийн дагуу АНУ-д нэвтрэхийг хатуу хориглосон орнуудад: Афганистан, Мьянмар, Чад, Бүгд Найрамдах Конго, Экваторын Гвиней, Эритрей, Гаити, Иран, Ливи, Сомали, Судан, Йемен зэрэг улс багтаж байна. Харин Куба, Венесуэл зэрэг долоон улсыг “хэсэгчлэн хязгаарлах” хэлбэрээр хоригт хамруулжээ.

Тус хориг 2025 оны зургаадугаар сарын 9-нөөс хүчин төгөлдөр мөрдөгдөж эхэлнэ. Цаашид уг шийдвэр шүүхийн маргаанд хүрэх магадлалтай бөгөөд Трампын анхны Ерөнхийлөгчийн бүрэн эрхийн хугацаанд гаргасан "Муслим хориг"-ийн нэгэн адил хууль зүйн сорилттой нүүр тулах төлөвтэй байна.

Эх сурвалж: BBC, Reuters, The White House