2025 оны эхнээс хойш Оросын хамгийн баян бизнес эрхлэгчдийн нийт хөрөнгө 22.6 тэрбум ам.доллараар өссөн талаар “Блумберг” агентлаг мэдээллээ. Энэхүү өсөлт нь олон улсын хөрөнгийн зах зээл дээрх хувьцааны ханшийн өсөлттэй холбоотойгоор бүрдсэн бөгөөд “Bloomberg Billionaires Index”-т тусгагдсан байна.

Жагсаалтын тэргүүн байранд орсон “Норникель” компанийн ерөнхийлөгч Владимир Потанин оны эхнээс 3.82 тэрбум долларын нэмэлт хөрөнгө олж, нийт хөрөнгө нь 31.7 тэрбум ам.долларт хүрчээ. Харин төмрийн хүдрийн хамгийн том үйлдвэрлэгчдийн нэг “Металлоинвест”-ийн гол хувьцаа эзэмшигч Алишер Усмановын хөрөнгө 3.7 тэрбумаар нэмэгдэж, 16.9 тэрбум ам.долларт хүрсэн байна.

“Bloomberg Billionaires Index” нь дэлхийн хамгийн баян 500 хүний хөрөнгийн хэмжээг өдөр бүр шинэчлэн тооцдог бөгөөд 2012 оны гуравдугаар сараас хойш тасралтгүй нийтлэгдэж байна.

Эх сурвалж: Bloomberg