АНУ-ын Ерөнхийлөгч Дональд Трамп ган болон хөнгөн цагааны импортын татварыг 25 хувиас 50 хувь болгон хоёр дахин өсгөх захирамжид гарын үсэг зурлаа. Лхагва гарагаас хэрэгжиж эхлэх уг шийдвэр нь Америкийн гангийн салбарын тогтвортой байдлыг хамгаалахаар чиглэж буйг Трамп онцолсон ч олон улсын зүгээс хүчтэй шүүмжлэл дагуулж байна.
Тус татварын нэмэгдэл нь 2025 оны гуравдугаар сараас хойш хоёр дахь удаагаа өсөж байгаа бөгөөд энэ нь автомашин, лаазалсан хүнс зэрэг метал ихээр ашиглагддаг салбарт шууд нөлөөлнө. Шүүмжлэгчид үүнийг гадаадын үйлдвэрлэгчдэд дарамт болж, худалдааны түншүүдийн эсэргүүцлийг өдөөж, эцэстээ Америкийн хэрэглэгчдийн худалдан авах чадварт сөргөөр нөлөөлнө гэж үзэж байна.
Гэсэн хэдий ч Трамп Их Британитай хийж буй худалдааны хэлэлцээний хүрээнд тус улсаас оруулж ирэх металлуудад өмнөх 25 хувийн татварыг хэвээр үлдээжээ. АНУ нь дэлхийд ган импортлогч орнуудын тоонд Европын холбооны дараа хоёрт жагсдаг бөгөөд гол нийлүүлэгч орнуудад Канад, Бразил, Мексик, Өмнөд Солонгос багтдаг.
Трамп 2017–2021 оны анхны бүрэн эрхийн хугацаанд үндэсний аюулгүй байдлыг хангах нэрийн дор ганд 25, хөнгөн цагаанд 10 хувийн татвар оноож байсан. Гэвч дараа нь АНУ холбоотнуудтай байгуулсан гэрээ болон зарим бизнесийн хүсэлтийн дагуу тодорхой бараа бүтээгдэхүүнийг татвараас чөлөөлсөн. Харин энэ оны гуравдугаар сард эдгээр хөнгөлөлтийг хүчингүй болгож, хамгаалалтын бодлогыг дахин чангатгасан юм.
Баасан гарагт АНУ-ын гангийн үйлдвэрт болсон уулзалтын үеэр Трамп мэдэгдэхдээ, “Америкийн бизнес эрхлэгчид гадаадын биш, зөвхөн дотоодын ханган нийлүүлэгчдээс авах нөхцөлийг бий болгохын тулд татварыг илүү өндөр болгохыг зорьж байна” хэмээн мэдэгдсэн нь тус бодлого ирэх сонгуулийн өмнөх популист алхмын нэг байж магадгүй хэмээн дүгнэхэд хүргэж байна.
Эх сурвалж: BBC News, Reuters, Bloomberg
