Их Британийн Ерөнхий сайд Кир Стармер өчигдөр улсынхаа батлан хамгаалахын стратегийг шинэ түвшинд гаргах, улмаар НАТО-гийн хамгийн дэвшилтэт гишүүн орон болгох зорилтоо олон нийтэд танилцууллаа. Шотланд дахь тэнгисийн цэргийн усан онгоцны үйлдвэрт хэлсэн үгэндээ тэрбээр цөмийн шумбагч онгоцууд шинээр бүтээж, Европт дайн тохиолдсон нөхцөлд бүрэн бэлтгэлтэй байхаар зэвсэгт хүчнээ чадавхжуулна гэдгээ мэдэгдэв. Энэ нь Москва болон Вашингтонд илгээж буй хүчтэй дохио болохыг ажиглагчид онцолж байна.
Батлан хамгаалахын шинэ стратеги нь 130 хуудас бүхий албан ёсны баримт бичигт тусгагдсан бөгөөд 2027 он гэхэд салбарын санхүүжилтийг дотоодын нийт бүтээгдэхүүний 2.5 хувь, 2030 он гэхэд 3 хувьд хүргэх зорилт тавьжээ. Энэ бол ЗХУ задраснаас хойших хугацаанд Их Британиас гаргаж буй хамгийн өргөн хүрээтэй, системчилсэн стратеги хэмээн үнэлэгдэж байгаа бөгөөд кибер орон зай дахь эрсдэл, цөмийн хүчин чадлыг бэхжүүлэх, батлан хамгаалах үйлдвэрлэлийн суурийг өргөтгөх зэрэг олон зорилтыг хамарсан байна.
Онцлох заалтуудаас дурдвал:
-
Австрали, АНУ-тай хамтарсан АУКУС түншлэлийн хүрээнд 12 шинэ цөмийн шумбагч онгоц үйлдвэрлэнэ.
-
Цөмийн хүчин чадлыг нэмэгдүүлэхэд 15 тэрбум фунт стерлинг зарцуулахаар тусгасан.
-
Ердийн зэвсэглэлийг 7000 ширхэг холын тусгалт зэвсгээр өргөтгөх.
-
Цэргийн 6 шинэ үйлдвэр барихад 1.5 тэрбум фунт стерлингийн төсөв хуваарилна.
-
Оросын талаас ирж буй кибер халдлагад хариу өгөх шинэ кибер командлал байгуулна.
Гэхдээ энэхүү баримт бичигт Их Британийн цэргийн бие бүрэлдэхүүнийг нэмэгдүүлэх талаар тусгаагүй байна. Европын орнуудын батлан хамгаалахын зардлыг нэмэгдүүлэх асуудал нь АНУ-ын зүгээс удаа дараа тавигдаж ирсэн ч ихэнх орнууд ДНБ-ий 2 хувийн босгыг хангалттай хэмжээнд биелүүлж чаддаггүй хэвээр байна. Үүнтэй холбоотойгоор АНУ-ын Ерөнхийлөгч асан Дональд Трамп НАТО-гийн гишүүдийг “аюулгүй байдалдаа хангалттай анхаарахгүй байна” хэмээн шүүмжилж, АНУ эвслээс гарч магадгүй гэсэн мэдэгдэл ч хийж байсан.
Ажиглагчдын үзэж байгаагаар энэхүү шинэ стратеги баримт бичиг нь Их Британи улс Украины дайн эхэлснээс хойш батлан хамгаалахын зардлаа эргэн харж, аюулгүй байдлын орчноо шинээр үнэлж эхэлсний тод илрэл юм.
Эх сурвалж: DW
