Европын Холбоо болон Филиппин улс батлан хамгаалах салбарт хамтын ажиллагаагаа өргөжүүлэхээр тохиролцсоныг Филиппиний Гадаад хэргийн сайд Энрике Манало, ЕХ-ны Гадаад бодлого, аюулгүй байдлын асуудал эрхэлсэн дээд төлөөлөгч Кая Каллас нар Манила хотноо болсон хамтарсан хэвлэлийн хурлын үеэр зарлалаа. Талууд ирээдүйд цэрэг, аюулгүй байдлын асуудлаар илүү гүнзгий хамтран ажиллах зорилготой байна.

Филиппиний тал “хил дамнасан аюул занал, кибер халдлага, гадаадын оролцоо, мэдээллийн манипуляцитай тууштай тэмцэхийн тулд ЕХ-ны орнуудтай аюулгүй байдлын хүрээнд яриа хэлэлцээг эрчимжүүлнэ” хэмээн мэдэгдэв. Энэ нь бүс нутгийн тогтвортой байдал, мэдээллийн аюулгүй байдлыг хамгаалахад чухал алхам болж байгаа юм.

Кая Калласын зүгээс мөн цэргийн хамтын ажиллагааг гүнзгийрүүлж, Номхон далайн бүсэд хүчний тэнцвэрийг хадгалах чиглэлд хамтран ажиллана гэдгээ илэрхийлсэн байна. Тэрээр "статус-квог өөрчлөх оролдлого" буюу Өмнөд Хятадын тэнгист Хятад улсын зүгээс гарч буй үйлдлүүдийг хүлээн зөвшөөрөхгүй гэдгээ ил тод хэлсэн. Энэ нь Европын Холбоо Филиппиний газар нутгийн бүрэн эрхт байдал, бүс нутгийн аюулгүй байдалд дэмжлэг үзүүлж буйг илтгэж байна.

Өмнөд Хятадын тэнгис нь 3.4 сая хавтгай дөрвөлжин км талбайтай бөгөөд Бээжин бараг бүх бүс нутгийг өөрийн мэдэлд хамааруулж, түүнийгээ ил тод зарласаар ирсэн. Гэвч энэ нь Вьетнам, Филиппин, Малайз зэрэг хөрш орнуудын тусгаар тогтнолд заналхийлж буй гэж Барууны орнууд үздэг. Иймээс ЕХ энэ удаа Филиппинтэй батлан хамгаалах салбарт гар нийлэн ажиллах амлалт өгч, бүс нутгийн аюулгүй байдалд илүү идэвхтэй оролцох болсныг илэрхийллээ.

Эх сурвалж: DW