Америкийн “Майкрософт” компанийг үүсгэн байгуулагч Билл Гейтс ирэх хорин жилийн хугацаанд өөрийн хөрөнгийн дийлэнх хэсгийг Африкийн эрүүл мэнд, боловсролын салбарт зарцуулахаа Этиопын нийслэл Аддис-Абебад илэрхийлжээ. Тэрбээр хүний нөөц бололцоог нээж хөгжүүлснээр тивийн улс орнууд жинхэнэ хөгжилд хүрнэ гэдэгт итгэлтэй байна хэмээн мэдэгдсэн юм. Мөн Африк тивд эрүүл мэндийн салбарыг дэмжихийн тулд хиймэл оюуны хөгжлийг хэрхэн ашиглах талаар залуу шинийг санаачлагчдад хандан уриалжээ.

Түүний байгуулсан Гейтсийн сан 2045 он гэхэд үйл ажиллагаагаа зогсоохоор төлөвлөж байгаа бөгөөд энэ хугацаанд 200 тэрбум ам.долларт хүрэх хөрөнгийнхөө 99 хувийг хандивлана гэдгээ Билл Гейтс өнгөрсөн сард мэдэгдсэн. Тэрбээр “Миний хөрөнгө та бүхний тулгамдаж буй асуудлуудыг шийдэхэд зориулагдана” хэмээн Африкийн Холбооны төв байранд хэлсэн үгэндээ онцолсон байна.

Сүүлийн жилүүдэд АНУ-ын засгийн газар “Америк нэгдүгээрт” бодлогын хүрээнд Африкт үзүүлж байсан ХДХВ/ДОХ-тай тэмцэх тусламжийн хөтөлбөрөө зогсоосон нь энэ тивийн ирээдүйг эмзэг болгож байгааг Гейтс хөндсөн. Харин түүний удирдаж буй сангийн хувьд анхан шатны тусламж үйлчилгээг сайжруулах, эх хүүхдийн эндэгдлийг бууруулах, халдварт өвчнөөс урьдчилан сэргийлэх, олон сая хүнийг ядуурлаас гаргах зэрэг гурван гол чиглэлд анхаарч ажиллах юм байна.

Гейтс хөрөнгийнхөө 99 хувийг хандивласны дараа ч дэлхийн тав дахь баян хүн хэвээр байх төлөвтэй байгаа талаар Bloomberg мэдээлжээ. Тэрбээр “Майкрософт”-ыг Пол Аллентай хамтран 1975 онд үүсгэн байгуулж, технологийн салбарт тэргүүлэгчдийн нэг болгож чадсан билээ. Харин 2000 онд гүйцэтгэх захирлын, 2014 онд ТУЗ-ийн албан тушаалаасаа тус тус татгалзан, буяны үйлст анхаарлаа төвлөрүүлж эхэлсэн юм.

Эх сурвалж: BBC