Өмнөд Солонгост ерөнхийлөгчийн ээлжит бус сонгуулийн санал хураалт өнөө өглөөний 06:00 цагаас улс даяар эхэллээ. Ерөнхийлөгч асан Юн Сог Ёль онц байдал зарласнаас хойш яг зургаан сарын дараа энэхүү сонгуулийг товлон зарласан бөгөөд санал авах ажиллагаа оройн 20:00 цаг хүртэл үргэлжлэх юм.

Сонгуулийн үндэсний хорооноос мэдээлснээр, улс даяар 14 295 санал авах байр нээгдэж, 44.3 сая орчим сонгогч саналаа өгөх эрхтэй. Өнгөрсөн долоо хоногт болсон хоёр өдрийн урьдчилсан санал хураалтад 15.4 сая сонгогч оролцсон нь 34.74 хувийн ирцтэй байж, 2014 оноос хойших хоёр дахь хамгийн өндөр үзүүлэлт болов.

Санал хураалт дуусмагц саналын хуудсыг шууд тоолж эхлэх бөгөөд ялагч шөнө дунд орчимд тодрох хүлээлттэй байна. Харин албан ёсны дүнг лхагва гарагийн өглөө 6:00 цагт гаргаж, 07:00-09:00 цагийн хооронд сонгуулийн дүнг чуулганы нэгдсэн хуралдаанаар батлах юм.

Сонгууль хугацаанаасаа өмнө болж байгаа тул шинэ ерөнхийлөгч сонгогдсоныхоо дараа шилжилтийн үегүйгээр шууд ажилдаа орно. Тангараг өргөх ёслол Үндэсний Ассемблейн танхимд хийгдэх төлөвтэй байгаа боловч дэлгэрэнгүй мэдээллийг дараа нь зарлана.

Энэ удаагийн ерөнхийлөгчийн сонгуульд:

• Ардчилсан намаас Ли Жэ Мён,

• Ардын хүч намаас Ким Мүн Сү,

• Шинэ шинэчлэлийн намаас Ли Жүн Сок,

• Ардчилсан хөдөлмөрийн намаас Квон Ён Гук,

• Бие даагч Сон Жин Хо нар нэр дэвшиж байна.

Сүүлийн санал асуулгаар Ли Жэ Мён 40 хувь, Ким Мүн Сү 30 хувь, Ли Жүн Сок 10 хувь тус тусын санал авч буй нь саналын зөрүү багасч байгааг харуулж байна.

Хоёр гол өрсөлдөгч эдийн засгийн өсөлт болон хиймэл оюун ухааны хөгжлийг тэргүүн амлалт болгож, гадаад бодлогод харилцан адилгүй байр суурь илэрхийлж байна. Ли Жэ Мён “прагматик” дипломат бодлого баримтлана гэж байхад, Ким Мүн Сү Умард Солонгосын аюулыг сөрөх “тогтоон барих хүчин”-ийг онцолсон юм.

Мөн тэд ерөнхийлөгчийн бүрэн эрхийн хугацаа болон сонгогдох давтамжийг өөрчлөх асуудалд ижил байр суурьтай байгаа нь анхаарал татаж байна. Ли Жэ Мён бүх нийтийн санал асуулгаар Үндсэн хуульд нэмэлт өөрчлөлт оруулахыг зорьж байгаа бол Ким Мүн Сү 2028 оноос хэрэгжүүлэхээр төлөвлөж, бүрэн эрхийн хугацаагаа богиносгох санал дэвшүүлжээ.

Эх сурвалж: Yonhap