Украин, Оросын төлөөлөгчид Истанбул хотод хоёр дахь удаагаа уулзаж, олзлогдсон цэргүүдийг дахин солилцох тохиролцоонд хүрсэн талаар Украины Ерөнхийлөгч В.Зеленский мэдэгдлээ. Уг уулзалт энэ даваа гарагт Туркийн Чираган ордонд болж, хоёр тал хаалттай хэлбэрээр хэлэлцээ хийжээ. Хэлэлцээний дараа В.Зеленский Литвийн нийслэл Вильнюст болсон “Бухарестын ес” ба Хойд Европын орнуудын дээд хэмжээний уулзалтын үеэр мэдэгдэл хийсэн байна.

Оросын талаас төлөөлөгч В.Мединский ТАСС агентлагт өгсөн мэдээлэлдээ 1000-1200 олзлогдогсдыг солилцох боломжтой байгааг дурдсан нь энэ удаагийн ажиллагаа хоёр талын дайны эхлэлээс хойших хамгийн өргөн хүрээтэй солилцоо болох төлөвтэйг илтгэж байна. Түүнчлэн талууд “6000:6000” гэсэн зарчмаар амь үрэгдэгсдийн цогцсыг солилцох, мөн хүнд өвчтэй цэргүүд болон 18-25 насныхныг харилцан солилцох санал дээр тохиролцжээ.

Украины Батлан хамгаалахын сайд Рустем Умеровын мэдээлснээр, Украин тал уулзалтын үеэр гурван үндсэн санал тавьсан байна. Үүнд:

1. Гал зогсоох гурван сарын хугацааны тохиролцоо байгуулах

2. Олзлогдсон бүх цэргүүдийг суллах

3. Хулгайлагдсан хүүхдүүдийг эх оронд нь буцаах,
   мөн Ерөнхийлөгч В.Зеленский, В.Путин нарын шууд уулзалт зохион байгуулах саналыг хүргүүлжээ.

Украин талаас энэхүү саналаа тавдугаар сарын 28-нд, харин Оросын тал хариу “санамж бичгээ” зургаадугаар сарын 2-нд гардуулсан байна. Талуудын өмнөх уулзалт тавдугаар сарын 16-нд мөн Истанбул хотод болж, “1000:1000” зарчмаар цэргүүдийг солилцохоор тохирсон нь гурван жилийн дараах хамгийн анхны ахиц байв.

Эх сурвалж: DW