2025 оны зургадугаар сарын 2-нд Колорадо мужийн Боулдер хотод болсон Израилийн барьцаалагдсан иргэдийг дэмжих жагсаалын үеэр гар хийцийн гал авалцуулах тэсрэх төхөөрөмж (Молотовын коктейль) шидсэн хэрэгт сэжиглэгдэж буй Мохаммед Сабри Солиман гэгч этгээд энэ халдлагыг бүтэн жилийн өмнөөс нарийн төлөвлөсөн болохыг АНУ-ын мөрдөн байцаах албаныхан мэдэгдлээ.
Египет улсын иргэн, 45 настай Солиман нь холбооны хэмжээнд үзэн ядлын гэмт хэрэг, мөн мужийн аллага үйлдэхийг завдсан, тэсрэх хэрэгсэл ашигласан, бие махбодид хохирол учруулсан зэрэг олон зүйл ангиар яллагдаж байна. Тэрбээр өнгөрсөн Ням гарагт "Free Palestine" хэмээн хашгирч байгаад жагсаалд оролцож байсан израилийг дэмжигч найман хүнийг шатаах оролдлого хийсэн бөгөөд 12 хүн эмнэлэгт хүргэгдсэн байна. Хохирогчдын дунд Холокостын амьд гэрч, 88 настай раввин Израиль Вилхелм ч байжээ.
Мөрдөн байцаалтын явцад Солиман нэг удаа биш дахин ийм халдлага хийх байсан гэж мэдүүлсэн бөгөөд тэрбээр цэцэрлэгийн ажилтны дүрд хувирч, замын хантааз өмсөн, ойртон очиж тэсрэх хэрэгслээ шиджээ. Мөн газар дээр нь 16 ширхэг асаагаагүй Молотовын коктейль болон октан бензин бүхий цацагч төхөөрөмж олдсон байна.
Тэрбээр буудлага хийхээр анх бодож байсан ч цагаачлалын нөхцөлөөс болоод галт зэвсэг авч чадаагүй тул гар хийцийн тэсрэх хэрэгслээр орлуулсан гэж мэдүүлжээ. Солиман YouTube-ийн бичлэг үзэн ийм хэрэгсэл хийх аргыг сурсан бөгөөд халдлага хийхээр шийдсэн онцгой үе нь охиных нь төгсөлтийн дараа байсан гэжээ.
Солиманыг баривчилсны дараа түүний эхнэр iPhone утсыг нь хураалгаж өгсөн бөгөөд тэр утсан дээр гэр бүлдээ үлдээсэн салах ёс бүхий зурвасууд байсан аж. Хууль хяналтын байгууллагынхан Солиман өмнө нь ямар нэгэн аюултай этгээд гэж бүртгэгдээгүй байсан гэж мэдэгдсэн.
Колорадо мужийн прокурорын зүгээс түүнийг хариуцлага хүлээлгэх бүхий л арга хэмжээг авна гэж мэдэгдсэн бөгөөд түүнийг анх 2022 онд АНУ-д визээр ирж, 2023 оны хоёрдугаар сард виз нь дууссан ч ардчилсан засаг захиргаанаас ажлын зөвшөөрөл авсан гэж зарим эх сурвалж тэмдэглэжээ.
Улс төрийн зүгээс энэ хэрэг хүчтэй шүүмжлэл дагуулж байна. Ерөнхийлөгч асан Дональд Трамп болон Төрийн нарийн бичгийн дарга Марко Рубио нар тус хэрэгтэй холбогдуулан “цагаачлалын бодлогыг чангатгах”, “террорист үзэл суртлыг дэмжигч этгээдүүдийг албадан гаргах” тухай байр сууриа илэрхийлжээ.
Энэхүү хэрэг нь АНУ дахь еврей иргэдийн эсрэг халдлагуудын цувааны нэг болж байна. Сүүлийн саруудад еврейчүүдийн эсрэг халдлага удаа дараа гарсаар байгаа бөгөөд тэдгээрийн ихэнх нь Палестин-Израилийн мөргөлдөөнтэй холбоотой уриа лоозон дагалдаж байгааг шинжээчид анхааруулж байна.
Эх сурвалж: Associated Press, CBS News
