Их Британийн Засгийн газар 2025 оны зургадугаар сарын 1-нээс эхлэн нэг удаагийн электрон тамхины худалдааг улсын хэмжээнд хориглолоо. Энэхүү шийдвэр нь өсвөр үеийнхний хэрэглээг хязгаарлах, байгаль орчныг хамгаалах, хог хаягдлыг бууруулах зорилготойгоор хэрэгжиж эхэлжээ.
Шинэ журмын дагуу жижиглэн худалдаачид никотин агуулсан эсэхээс үл хамааран нэг удаагийн электрон тамхийг онлайнаар болон дэлгүүрт худалдаалах эрхгүй болсон байна. Харин дахин цэнэглэдэг, дахин ашиглах боломжтой төрлийг худалдаалахыг хориглоогүй бөгөөд зөвшөөрч буй хэвээр байна.
Сүүлийн жилүүдэд сургуулийн орчинд нэг удаагийн электрон тамхины хэрэглээ огцом нэмэгдэж, хэрэглэж дууссаны дараах хаягдал нь байгаль орчинд ноцтой аюул учруулж буйг мэргэжилтнүүд анхааруулсаар ирсэн. Судалгаагаар Их Британид долоо хоног бүр 5 сая орчим нэг удаагийн электрон тамхийг дахин боловсруулахгүйгээр хаядаг гэсэн тоо гарчээ.
Дэлхий даяар электрон тамхины хэрэглээ огцом өсөж, зохицуулалт шаардлагатай болоод байгаа энэ үед Австрали, Бельги зэрэг улс ч мөн адил хатуу хязгаарлалт тогтоож эхэлсэн байна. Австралид зөвхөн эмийн сангаар дамжуулан худалдаалахыг зөвшөөрч байгаа бол Бельги улс 2024 оны эхээр нэг удаагийн электрон тамхийг хориглосон Европын анхны орон болсон. АНУ-ын Калифорни муж ч энэ чиглэлээр хамгийн идэвхтэй ажиллаж байгаа бүс нутагт тооцогдож байна.
Эх сурвалж: Associated Press
