Японд зуны улиралд хэт халалт аюултай хэмжээнд хүрэх нь улам бүр түгээмэл болж, ажилчдын эрүүл мэндийг хамгаалах асуудал нийгмийн анхаарлын төвд орж байна. Үүнтэй холбогдуулан Японы Засгийн газар ням гарагаас эхлэн компаниудад ажилтнуудаа хэт халуунаас сэргийлэх, онцгой нөхцөлд тусламж үзүүлэх бэлтгэлтэй байхыг шаарджээ.

Тухайлбал, барилгын салбарын ажилтнууд халуунд цохиулах эрсдэл өндөртэй тул тэдэнд зориулан агааржуулагч байрлуулах, мөстэй ус хүрэлцээтэй байлгах, ажилчид яаралтай үед хэнтэй холбоо барих талаар урьдчилсан мэдлэгтэй байх, компанийн дотоод журмыг боловсронгуй болгох шаардлагатай болжээ.

2024 онд Японд 1257 хүн ажлын байран дээрээ наранд цохиулж, 31 нь амь насаа алдаж, энэхүү тоо түүхэн дэх хамгийн өндөр үзүүлэлт болж бүртгэгдсэн байна. Энэ нөхцөл байдалд хариу үйлдэл үзүүлэхийн тулд Токио хотын нэгэн мэдээллийн технологийн компани ажилчдын биеийн байдлыг хянах шинэ систем боловсруулжээ. Тус систем нь ажилтнуудын биеийн жинг өдөрт хэд хэдэн удаа хэмжих бөгөөд мөн асуулгад үндэслэн эрсдэлийн түвшинг үнэлдэг байна.

Японы Эрүүл мэндийн яамнаас мэдээлснээр, хэрэв хүний биеийн жингийн 1.5 хувиас илүү хэмжээний ус хөлсөөр алдагдвал наранд цохиулах өндөр эрсдэлтэйд тооцогддог. Энэ шалтгаанаар мэргэжилтнүүд наранд цохиулах эрсдлээс сэргийлэх арга хэмжээг зөвхөн томоохон байгууллагууд бус, жижиг дунд бизнес эрхлэгчдийн хүрээнд ч өргөн хүрээтэй хэрэгжүүлэх шаардлагатайг онцолжээ.

Тоёо их сургуулийн дэд профессор Китаока Дайсүкэгийн үзэж буйгаар Засгийн газар жижиг компаниудыг тоног төхөөрөмжийн зардалд нь зориулан татаас болон бусад хэлбэрээр дэмжих нь маш чухал. Тэрбээр, энэ нь ажил олгогчдод халуунтай тэмцэхэд илүү үр дүнтэй, бодит шийдэл санал болгоход тусална хэмээн онцолсон байна.

Эх сурвалж: NHK