Хятад Улсын Худалдааны яам өнөө өглөө мэдэгдэл гаргаж, АНУ-ын зүгээс Хятадыг онилсон олон шатны хязгаарлалтын арга хэмжээ авсан нь Женевт хийсэн худалдаа, эдийн засгийн хэлэлцээний үеэр хүрсэн хоёр талын тохиролцоог ноцтой зөрчиж байна гэж мэдэгдлээ.

Хятадын талын мэдээлснээр АНУ-аас хэрэгжүүлсэн арга хэмжээнд хиймэл оюунд зориулсан чипний экспортод хяналт тавих шинэ журам гаргах, чипний дизайны программ хангамжийг Хятадад худалдаалахыг хориглох, Хятад оюутнуудын визийг хүчингүй болгох зэрэг үйлдлүүд багтаж байгаа аж. Хятадын Худалдааны яамны хэвлэлийн төлөөлөгч эдгээр алхамыг 2024 оны нэгдүгээр сарын 17-нд хоёр улсын төрийн тэргүүн нар утсаар ярьж, харилцан ойлголцолд хүрсэн тохиролцоог илт зөрчсөн хэмээн шүүмжилжээ.

Тэрбээр цааш нь, АНУ хоёр улсын худалдаа, эдийн засгийн харилцаанд тодорхойгүй байдал бий болгож, шинэ маргаан өдөөж байна хэмээн мэдэгдээд, өөрийн буруутай үйлдлээ эргэцүүлэн бодохын оронд Хятадыг тохиролцоо зөрчсөн гэж үндэслэлгүйгээр буруутгаж байгааг шүүмжилсэн байна. Хятад улс энэхүү гуйвуулсан мэдээллийг эрс няцааж байгаагаа илэрхийлжээ.

Мөн Хятадын тал Женевийн хэлэлцээний үр дүнд хүрсэн тохиролцоог тууштай хэрэгжүүлж, хариуцлагатай байр суурь баримталсаар ирсэн бөгөөд АНУ-ыг хамтран ажиллаж, буруу шийдвэрүүдээ засаж залруулахыг уриалсан байна. Хэрэв АНУ цаашид Хятадын хууль ёсны эрх ашгийг хохироосоор байвал шаардлагатай тохиолдолд Хятад улс хатуу арга хэмжээ авахаа анхааруулжээ.

Эх сурвалж: Xinhua