Япон улс 2023 оны наймдугаар сард Фүкүшимагийн атомын цахилгаан станцаас 1 сая тонн гаруй цэвэршүүлсэн цацраг идэвхт хаягдал усыг далайд цутгасан нь олон улсын хэмжээнд маргаан дэгдээж, Хятад улс Японы далайн гаралтай хүнсний бүтээгдэхүүний импортыг бүрэн хориглох шалтгаан болсон билээ.
Харин хоёр жилийн турш үргэлжилсэн энэхүү худалдааны хориг цуцлагдах шатандаа орж, Японы далайн бүтээгдэхүүн Хятадын зах зээлд дахин нэвтрэх боломж бүрдэж байна. Талууд энэ долоо хоногт Бээжинд уулзалт хийж, техник, хяналтын шаардлагуудын талаар нэгдсэн ойлголтод хүрсэн тухай Японы Засгийн газрын ерөнхий нарийн бичгийн дарга Ёшимаса Хаяаши мэдэгдэв. Тэрбээр “Далайн бүтээгдэхүүний экспортыг сэргээхэд шаардагдах техникийн тохиролцоог бид Хятадын талтай амжилттай хийсэн” хэмээн онцоллоо.
Фүкүшимагийн хаягдал усны асуудлыг Олон улсын атомын энергийн агентлаг аюулгүй гэж үнэлсэн ч Хятад болон зарим хөрш орнууд энэхүү үйлдлийг шүүмжилж байсан. Үүний улмаас Японы далайн гаралтай экспортод хатуу хориг тавьсан юм.
Хэлэлцээрийн шинэ нөхцөлийн дагуу:
-
Японы далайн бүтээгдэхүүн боловсруулах үйлдвэрүүд Хятадад албан ёсоор бүртгүүлэх ёстой.
-
Бүтээгдэхүүнд цацраг идэвхт бодис илрээгүй болохыг баталгаажуулсан хяналтын гэрчилгээг хавсаргах шаардлагатай.
Ийнхүү хоёр орны худалдааны зөрчил намжиж, Японы далайн бүтээгдэхүүн Хятадын том зах зээлд эргэн орж ирэх нөхцөл бүрдэж байна. Энэ нь бүс нутгийн худалдаа, харилцаанд эерэг дохио болохоор байна.
Эх сурвалж: Al Jazeera.
