Германы алдарт “Haribo” компани Нидерландад нийлүүлсэн “Happy Cola F!ZZ” нэртэй гурван уут чихрээс каннабис илэрсний дараа уг бүтээгдэхүүнүүдээ тус улсаас эргүүлэн татах шийдвэр гаргалаа. Каннабис илэрсэн тохиолдол хэдий цөөн ч гэлээ, компанийн зүгээс урьдчилан сэргийлэх зорилгоор бүх 1 кг-ын савлагаатай, 2026 оны нэгдүгээр сар хүртэл хадгалах хугацаатай “L341-4002307906” дугаартай бүтээгдэхүүнийг худалдан авагчдаас буцаахыг хүсжээ.

Нидерландын Хүнс, хэрэглээний бүтээгдэхүүний аюулгүй байдлын газар (NVWA)-аас мэдээлснээр, энэ чихрийг хэрэглэсэн хүмүүс дотор муухайрах, толгой эргэх зэрэг шинж илэрсэн тухай хүүхэд, насанд хүрэгчдийн зүгээс гомдол гаргасан байна. Цагдаа нар дээрх гомдлын дагуу шалгаж, NVWA-д мэдээлснээр уг дүгнэлт гарчээ. Тус газрын төлөөлөгч Саида Ахядын хэлснээр, “колатай чихэрт сэжиг бүхий бодис байж болзошгүй” гэж үзэж, хэрэглэхгүй байхыг анхааруулсан байна.

“Haribo” компанийн маркетинг хариуцсан дэд ерөнхийлөгч Патрик Такс Франс Пресс агентлагт өгсөн ярилцлагадаа “Хэрэглэгчдийн аюулгүй байдал бол бидний тэргүүн зорилт бөгөөд бид энэхүү асуудлыг маш нухацтай авч үзэж, Нидерландын хууль сахиулах байгууллагуудтай хамтран шалгалт хийж байна” хэмээн онцолсон. “Haribo” нь олон улсын хэмжээнд нэр хүндтэй, 1965 оноос хойш кола амттай чихэр үйлдвэрлэж буй томоохон үйлдвэрлэгч билээ.

Эх сурвалж: DW