Америкийн The New York Times сонинд мэдээлснээр, Оросын Зэвсэгт хүчний анги нэгтгэлүүд Украинд зуны давшилтаа албан бусаар эхлүүлээд байгаа бөгөөд байлдааны талбарт сүүлийн хугацаанд хамгийн хурдтай урагшилж буйг онцолсон байна. Уг мэдээлэлд “Оросын арми энэ жилийн хамгийн эрчимтэй давшилтаа хийж байна. Кремлийн зуны давшилт одоогоор хамгийн идэвхтэй үе шатандаа оржээ” хэмээн дурджээ.

Оросын цэргийн удирдлага хуурай, цаг агаарын хамгийн тохиромжтой цаг үеийг ашиглан довтолгоогоо идэвхжүүлж, энэ зуны турш хэлэлцээний ширээний ард өөрт ашигтай нөхцөлөөр суухыг зорьж буй бололтой гэж ажиглагчид үзэж байна.

Германы Der Spiegel хэвлэл ч мөн адил энэ талаар мэдээлэхдээ, Оросын довтолгоо Украины хойд хэсэг, Сумын мужид эхэлсэн талаар онцолжээ. Үүний улмаас Украины Ерөнхийлөгч Владимир Зеленский гадаадын айлчлалаа зогсоож, Герман дахь албан ёсны арга хэмжээгээ дуусгалгүй эх орондоо буцсан байна.

ОХУ 2024 оны сүүлчээс хойш хэд хэдэн байрлалд давшилт хийсэн ч энэ удаагийн зуны давшилт илүү том цар хүрээтэй, стратегийн ач холбогдол өндөртэй болохыг барууны шинжээчид анхааруулж байна. Хуурайшсан улирал нь хуягт техник, артиллерийн зэвсэглэлтэй урагшлахад таатай нөхцөл бүрдүүлдэг тул Оросын тал энэ боломжийг ашиглан давуу байдал бий болгохоор оролдож байна.

Хариуд нь Украин улс батлан хамгаалах бэлтгэлээ эрчимжүүлж, олон улсын цэргийн тусламжийн хүрээнд шинэ техник хүлээн авч буй ч, дайны нөхцөл байдал богино хугацаанд ихээхэн өөрчлөгдөх эрсдэлтэй байгааг ажиглагчид анхааруулж байна.

Эх сурвалжууд: The New York Times, Der Spiegel, Gazeta.ru