Японы эрх баригчид осолд өртсөн Фукушимагийн атомын цахилгаан станцын (АЦС) ойролцоогоос цуглуулсан, цацрагийн агууламж багатай хөрсийг Ерөнхий сайд Шигэрү Ишибагийн албан өргөө болон бусад төрийн байгууллагуудын гадна талбайн тохижилтод ашиглахаар төлөвлөж буйгаа зарлалаа. Энэ шийдвэр нь олон нийтийн эргэлзээг арилгахаар, уг хөрс аюулгүй гэдгийг харуулах зорилготой хэмээн тайлбарлаж байна.

2011 оны гуравдугаар сарын 11-нд болсон газар хөдлөлт, цунамигийн дараа Фукушимагийн АЦС-д гурван реакторын түлш хайлж, цацраг идэвхт бодис алдагдсанаар Японы түүхэнд тохиосон хамгийн ноцтой цөмийн гамшиг болсон. Үүний улмаас ойр орчмын газар нутаг өргөн хүрээнд бохирдож, нийтдээ 14 сая орчим шоо метр шавар шороог цуглуулан тусгай агуулахад хадгалсаар байгаа.

Японы хууль тогтоомжоор энэ бохирдсон хөрсийг 2045 оны гуравдугаар сараас өмнө Фукушима мужаас бүрэн гаргах үүрэгтэй. Гэвч тээвэрлэх болон дахин ашиглах асуудал олон жил маргаантай хэвээр байгаа юм. Шинэ төлөвлөгөөгөөр энэхүү цацрагийн түвшин бага, цэвэрлэгдсэн хөрсийг улсын хэмжээнд нийтийн зориулалттай тохижилтын төслүүдэд ашиглахыг уриалж байгаа бөгөөд энэ хүрээнд төрийн өндөр албан тушаалтнуудын байрыг сонгосон нь олон нийтэд итгэл төрүүлэх бодлого хэмээн үзэж буй.

Гэсэн хэдий ч уг шийдвэр нь эрүүл мэндийн эрсдэл болон байгаль орчны нөлөөлөлд сэтгэл зовниж буй иргэдийн шүүмжлэлтэй тулгарч байгаа бөгөөд цацрагтай хөрсийг дахин ашиглах нь ёс зүйн хувьд ч, аюулгүй байдлын хувьд ч болгоомжлол төрүүлж байна. Тус хөрсийг аль хэмжээнд хүртэл цэвэршүүлсэн, ямар шалгуураар ашиглаж болохыг нарийвчлан тогтоох шаардлагатай гэж шинжээчид онцолж байна.

Эх сурвалж: NHK, The Asahi Shimbun, Japan Times