“Al Arabiya” телевизийн мэдээлснээр, Израил болон Палестины ХАМАС хөдөлгөөн Газын зурваст 60 хоногийн хугацаатай гал зогсоох гэрээний төслийг хүлээн зөвшөөрсөн бөгөөд энэ талаар талууд АНУ-ын Ерөнхийлөгчийн тусгай элч Стивен Уиткоффт мэдэгдсэн гэжээ. Энэхүү тохиролцоог ойрын хугацаанд АНУ-ын Ерөнхийлөгч Дональд Трамп албан ёсоор зарлах төлөвтэй байна гэж эх сурвалж дурдсан байна.

Гэвч ХАМАС хөдөлгөөний зүгээс Уиткоффын саналыг судалж буй ч, тохиролцоонд хүрсэн гэх мэдээлэл бодит байдалтай нийцэхгүй гэсэн байр суурийг “Quds” цахим хуудсаар дамжуулан илэрхийлжээ. Тус хөдөлгөөн уг мэдээлэлд одоогоор тодорхой тайлбар өгөөгүй байгаа юм.

Израилын “Ynet” цахим хуудсаар өмнө нь мэдээлснээр, Уиткоффын шинэ төлөвлөгөөнд:

• 60 хоногийн хугацаанд гал зогсоох,

• Эхний долоо хоногт барьцаанд байгаа 10 хүнийг хоёр үе шаттайгаар суллах,

• ХАМАС-аас 18 хүний цогцсыг Израилын талд хүлээлгэн өгөх,

• Израилын зүгээс батлагдсан жагсаалтын дагуу Палестины хоригдлуудыг суллах,

• Мөн НҮБ болон олон улсын байгууллагуудаар дамжуулан Газын зурваст хүмүүнлэгийн тусламж хүргэх зэрэг заалтууд багтжээ.

Энэ гэрээг хүлээн зөвшөөрсөн тухайгаа Израилын Ерөнхий сайд Биньямин Нетаньяху тавдугаар сарын 29-ний өдөр мэдэгдсэн бөгөөд гэрээний нөхцөлийг тодорхой заасан албан ёсны жагсаалтыг талуудад илгээх бэлтгэлээ хангаж байгааг АНУ-ын тусгай элч өмнө нь мэдэгдсэн билээ.

Одоогоор гал зогсоох асуудлаар албан ёсны зар тараагүй бөгөөд талуудын байр суурь бүрэн нэгдвэл Газын зурваст нөхцөл байдал намжих, хүмүүнлэгийн тусламжийг хэвийн хүргэх боломжтой болох юм.

Эх сурвалжууд: TASS, Al Arabiya, Quds Net, Ynet