Туркийн Хууль зүйн яам болон эрх баригч Шударга ёс, хөгжлийн намын депутатууд хамтран боловсруулсан хуулийн төсөл энэ долоо хоногт парламентын хэлэлцүүлэгт орж магадгүй байна. Рамадан-байрамын баярын өмнө батлагдахаар төлөвлөж буй уг хуулийн дагуу 45-50 мянган хоригдлыг хугацаанаас нь өмнө суллах боломж бүрдэх аж.

Одоогоор Туркийн шоронгуудад 410 мянга гаруй хүн хоригдож байгаа бөгөөд хуулийн нэмэлт өөрчлөлтөөр ял нь дуусахад гурван жилээс доош хугацаа үлдсэн тохиолдолд үлдсэн ялаа шоронгоос гадуур, хатуу хяналт дор эдлэх бололцоог олгоно. Гэхдээ суллагдах хүмүүсийн хэргийг тусгай ажиглалтын комисс нягт шалгаж, сэтгэцийн эмгэгтэй болон хүчирхийллийн шинжтэй гэмт хэрэг үйлдсэн этгээдүүдэд энэ хөнгөлөлт хамаарахгүй.

Мөн давтан гэмт хэрэгтнүүдийн ял хэт хатуу байгаа нь засрал хүмүүжлийг сааруулж байгааг эрх баригчид онцолж, ялыг хөнгөлөх бололцоог судалж байна. Харин үүний зэрэгцээ “жижиг зөрчил” гэж ангилдаг зарим хэрэгт ногдуулах шийтгэлийг чангатгаж, өмнө нь биеэр эдлүүлэх шаардлага тавьдаггүй байсан хоёр хүртэлх жилийн ялтай хэргийн хувьд тав хоногоос долоо хоног хүртэл заавал хорих зохицуулалт оруулах санал гаргасан байна.

Түүнчлэн террорист байгууллагад албан ёсоор элсээгүй ч тэдний сонирхлыг дэмжсэн үйлдэл хийсэн этгээдэд оноох ял тодорхой бус, ойлгомжгүй гэх үндэслэлээр Үндсэн хуулийн цэцээс шүүмжлэл хүлээж авсан ч шинэ томьёолол тусгагдаагүй байна.

Энэхүү хуулийн төсөл нь Туркийн шоронгийн хэт ачааллыг бууруулах, хорих ялын үр нөлөөг дээшлүүлэх, хоригдлыг нийгэмшүүлэх үйл явцыг сайжруулах зорилготой. Учир нь тус улсад луйвар, авлига, хүнд ба онц хүнд гэмт хэрэгт маш олон жилийн хорих ял ногдуулдаг. Жишээлбэл, шинээр төрсөн өвчтэй нярай хүүхдүүдийг хууль бусаар шилжүүлэн өгч ашиг олсон 47 эмнэлгийн ажилтантай гэмт бүлэглэлийн гишүүдийг 177-оос 582 жилийн ял оноосон нь дуулиан тарьсан хэрэг байв.

Эх сурвалж: Kazinform