Мексик улс бүх шатны шүүгчдийг сонгогчдын саналаар тодруулдаг дэлхийн анхны улс болох алхмыг хийж эхэллээ. Энэ нь авлига, хариуцлагагүй байдалтай тэмцэх зорилготой шинэчлэл боловч олон нийтийн дунд маргаан дэгдээгээд байна.
Шинэчлэлийн хүрээнд ирэх ням гарагт холбооны, дүүргийн болон орон нутгийн хэдэн мянган шүүгчийг ард нийтийн санал хураалтаар сонгохоор төлөвлөжээ. Үлдсэн шүүгчдийг 2027 онд ижил байдлаар сонгох аж. Засгийн газрын зүгээс энэ үйл явц нь авлигатай тэмцэх, шүүхийн системийн итгэлийг сэргээх томоохон алхам хэмээн үзэж байна. Гэхдээ эсэргүүцэгчдийн зүгээс энэ нь эсрэгээрээ шүүхийн хараат бус байдалд заналхийлж, нэр хүндгүй хүмүүсийг сонгох эрсдэлийг дагуулна гэж анхааруулжээ.
Тухайлбал, олон улсын хэмжээний хар тамхины наймаачин Хоакин “Эль Чапо” Гузманы өмгөөлөгч гэх мэт этгээдүүд нэр дэвшиж магадгүй гэсэн болгоомжлол бий. Гэхдээ нэр дэвшигч нь хууль зүйн боловсролтой, мэргэжлээрээ ажиллаж байсан туршлагатай, гэмт хэрэгт холбогдоогүй байх зэрэг нарийвчилсан шалгуур тавигдах юм.
Шүүхийн салбарынхан болон зарим хуульчид энэхүү шинэчлэлд хүчтэй эсэргүүцэж, хэд хэдэн удаа эсэргүүцлийн жагсаал цуглаан зохион байгуулсан ч үр дүнд хүрээгүй байна. Мексикийн 28 настай хуульч Олимпиа Рохас Лувиано “шударга ёс бол санал өгч шийддэг зүйл биш, харин мэргэжлийн мэдлэгтэй хүмүүсийн ажил” хэмээн шүүмжилжээ. Харин нийслэлийн шүүхэд нэр дэвшиж буй шүүгч Мариа дель Росио Моралес “улс орныхоо төлөө ажиллана” хэмээн илэрхийлжээ.
Шинэчлэл хэрэгжсэн тохиолдолд Мексик улс шүүгчдийг ард нийтийн санал хураалтаар сонгодог дэлхий дээрх цорын ганц улс болох юм.
Эх сурвалж: AFP
