АНУ-ын холбооны шүүх Ерөнхийлөгч Дональд Трампын гадаад улс орнуудын эсрэг татвар ногдуулах шийдвэрт хориг тавьснаар түүний эдийн засгийн бодлогод томоохон цохилт өглөө. Манхэттен дүүргийн олон улсын худалдааны шүүх АНУ-ын Үндсэн хуулийг үндэслэн “гадаад худалдааг зохицуулах онцгой эрхийг зөвхөн Конгресст олгосон” гэдгийг онцолж, Ерөнхийлөгчийн гаргасан татварын шийдвэр хууль зөрчсөн гэж үзсэн байна.

Цагаан ордны зүгээс онцгой байдал зарласан нөхцөлд гүйцэтгэх засаглал тодорхой эрх мэдэлтэй гэж тайлбарладаг ч шүүх энэ байр суурийг хүлээн зөвшөөрсөнгүй. Ерөнхийлөгч Трамп Хятад, Мексик, Канад зэрэг улсуудаас ирж буй мансууруулах бодис, хууль бус цагаачлалыг үндэслэн эдгээр улсад өндөр татвар ногдуулахаар шийдвэрлэсэн ч шүүхээс уг арга хэмжээнүүдэд мөн хориг тавьжээ.

Трампын засаг захиргаа уг шийдвэрт хэдхэн минутын дотор давж заалдсан бол, Цагаан ордны хэвлэлийн төлөөлөгч Куш Десай “үндэсний хэмжээний онцгой нөхцөлд зөв шийдвэр гаргах нь сонгогдоогүй шүүгчдийн бус, сонгогдсон удирдагчийн үүрэг” хэмээн мэдэгдэв. Тэрбээр Трамп “Америкийг эн тэргүүнд тавина” хэмээх амлалтаа биелүүлэхийн тулд бүхий л гүйцэтгэх хөшүүргийг ашиглах болно гэдгийг ч тодотгосон байна.

Дональд Трамп дөрөвдүгээр сарын 2-нд дэлхийн улс орнуудад татвар ногдуулах талаар мэдэгдэл хийснээс хойш дэлхийн санхүүгийн зах зээлд тодорхойгүй байдал үүсээд байгаа юм. Тухайлбал, Японы Nikkei 225 индекс 1.5 хувь, Австралийн ASX 200 индекс бага зэргийн өсөлттэй байж, АНУ-ын индексүүд ч шүүхийн шийдвэрийн дараа өссөн хандлагатай байна.

Цагаан ордон зарим улсын засгийн газартай хийсэн хэлэлцээний үр дүнд татварын хувь хэмжээг бууруулж, зарим нөхцөлийг дахин үнэлж байгаа талаар мэдээлжээ.

Эх сурвалж: BBC