Жил бүрийн зургаадугаар сарын 1-нд улс орнууд “Дэлхийн сүүний өдөр”-ийг өргөнөөр тэмдэглэдэг уламжлалтай. 2001 онд НҮБ-ын Хүнс, хөдөө аж ахуйн байгууллагаас санаачлан эхлүүлсэн уг өдрийн гол зорилго нь сүү, сүүн бүтээгдэхүүний ач холбогдлыг олон нийтэд таниулахад оршдог. Харин Монгол Улсад энэ өдрийг мэргэжлийн байгууллагууд, үйлдвэрлэгчид дотоод хүрээнд тэмдэглэсээр ирсэн бол энэ жил цар хүрээгээ тэлж, олон нийтэд зориулсан томоохон арга хэмжээг зохион байгуулах гэж байна.
“Milk Festival-2025” нэртэйгээр анх удаа зохиогдох энэхүү өдөрлөг нь Үндэсний цэцэрлэгт хүрээлэнд болох бөгөөд “Сүү”, “Апу Дэйри”, “Тэсо фүүдс”, “Витафит милк”, “Монфреш”, “Үлэмж органик” зэрэг үндэсний үйлдвэрлэгчид, ХХААХҮЯ, НҮБ-ын Хүнс, хөдөө аж ахуйн байгууллага, Монголын сүүний нэгдсэн холбоо зэрэг байгууллагууд хамтран зохион байгуулж байна.
Фестивалийн үндсэн зорилго нь эрүүл иргэнийг төлөвшүүлэх, ялангуяа өсвөр үе, хүүхдүүдэд сүү, сүүн бүтээгдэхүүний ач холбогдлыг ойлгуулж, өдөр тутмын хэрэглээ болгоход чиглэж байгаа юм. Үзэсгэлэн арга хэмжээний хүрээнд компаниуд өөрсдийн “сүүн өртөө”-г байгуулж, амталгаа, гарын бэлэг, хүүхдэд зориулсан хөгжөөнт тоглоом, жүжигчилсэн тоглолт, Cosplay уралдаан, циркийн үзүүлбэр зэрэг урлаг, соёлын олон талт хөтөлбөрийг хэрэгжүүлнэ.
Ташрамд дурдахад, Монгол Улс 2016 онд “Дэлхийн сүүний өдөр”-ийг анх удаа албан ёсоор тэмдэглэж байсан бөгөөд энэ удаагийн “Milk Festival-2025” нь олон нийтэд чиглэсэн хамгийн өргөн цар хүрээтэй арга хэмжээ болох юм.
Эх сурвалж: НҮБ-ын Хүнс, хөдөө аж ахуйн байгууллага, ХХААХҮЯ
