Европын Холбооны гишүүн орнууд лхагва гарагт хуралдаж, Сирийн эсрэг авсан эдийн засгийн хориг арга хэмжээнүүдээс аюулгүй байдалтай холбоогүй бүх хоригийг цуцлах шийдвэр гаргалаа. Энэ нь олон жил үргэлжилсэн дайн, улс төрийн тогтворгүй байдалд нэрвэгдсэн тус улсыг сэргээн босгоход шинэ боломж нээж байна.
Шинэ хууль батлагдсанаар Сирийн Төв банк болон тус улсын зээлдэгчид Европын санхүүгийн зах зээлд дахин нэвтрэх эрхтэй болж, богино хугацаанд дэд бүтцээ сэргээх, санхүүгийн урсгалыг нээх нөхцөл бүрдэх юм. Энэхүү шийдвэр ЕХ-ны албан ёсны сэтгүүлд нийтлэгдсэн даруйд хэрэгжиж эхлэх бөгөөд өнгөрсөн долоо хоногт ЕХ-ны Гадаад хэргийн сайд нарын уулзалтын үеэр уг санаачилгыг дэмжсэн байна.
ЕХ-ны Гадаад харилцаа, аюулгүй байдлын асуудал эрхэлсэн дээд төлөөлөгч Кая Каллас “Энэ бол хийх ёстой зөв алхам. Бид сиричүүдийн улс төрийн шинэчлэл, ирээдүйн төлөөх хүсэл тэмүүллийг чин сэтгэлээсээ дэмжиж байна” гэж мэдэгдсэн бол Германы Гадаад хэргийн сайд Иоханн Вадефуль Сирийн сэргээн босголтод бүх шашин, бүх бүлгийг оролцуулахыг онцлон тэмдэглэж, тус улсын иргэд ирээдүйгээ өөрсдөө бүтээх боломжтой болсныг онцоллоо.
Сирийн иргэдийн нөхцөл байдал харьцангуй тогтворжиж байгааг ЕХ-ны зүгээс үнэлж байгаа бөгөөд олон зуун мянган дүрвэгч эх орондоо буцаж ирэх нөхцөл бүрдэхэд энэ шийдвэр эерэг нөлөө үзүүлнэ гэж үзэж байна.
Гэвч лхагва гарагт батлагдсан энэхүү шийдвэр нь Башар аль-Асадын дэглэмтэй холбоотой этгээд, байгууллагуудад хамаарахгүй бөгөөд зэвсэг болон мөрдлөг, хавчлагад ашиглагдаж болзошгүй бараа, технологийн экспортод тавьсан хязгаарлалтууд хүчинтэй хэвээр үлдэж байна.
Эх сурвалж: Reuters
