Норвегийн хаан ширээг залгамжлах хоёрдугаарт бичигддэг гүнж Ингрид Александра Австрали Улсад их сургуульд суралцахаар болж, Сиднейн их сургуулийн олон улсын харилцаа, улс төрийн эдийн засгийн чиглэлээр сурахаар элсэн оржээ. Гүнж ирэх наймдугаар сараас эхлэн сургалтаа эхлүүлэх бөгөөд бүрэн цагаар суралцаж, энгийн оюутнуудын адил оюутны байранд амьдрах аж.
Өдгөө 21 настай И.Александра Норвегийн хаан V Харальдын ач, угсаа залгамжлах хунтайж Хаакон, гүнж Метте-Марит нарын ууган охин юм. Гадаад оронд суралцах нь түүний хувьд шинэ зүйл биш бөгөөд ээж нь ч өмнө нь Австралид нэг жил ахлах сургуульд суралцаж байсан түүхтэй.
Сиднейн их сургуулийн дэд ерөнхийлөгч Кирстен Эндрюс гүнжийг халуун дотноор угтан авахад бэлэн байгаагаа илэрхийлж, “Оюутны хотхонд өнгөрүүлсэн мөчүүд хүн бүрийн хувьд үнэ цэнтэй байдаг. Манай их сургуулийн нийгэмлэг, клуб, хүрээлэн буй орчин гүнжийн сэтгэлд нийцнэ гэдэгт итгэлтэй байна” хэмээн мэдэгдсэн байна.
Гүнж Ингрид Александра нь Осло хотод төрж өссөн бөгөөд саяхан 15 сарын хугацаанд Норвегийн армид алба хааж, цэргийн инженер, буучийн албыг гүйцэтгэсэн юм. Тэрбээр уур амьсгалын өөрчлөлт, байгаль орчны хамгаалал зэрэг сэдвийг гүнзгий сонирхдог бөгөөд энэ чиглэлээр ч нийгмийн оролцоогоо идэвхтэй үргэлжлүүлдэг гэдгээрээ танигдсан билээ.
Эх сурвалж: BBC
