Францын эзэн хаан Наполеон Бонапартын хэрэглэж байсан түүхэн сэлэм Парисын “Drouot” дуудлага худалдааны ордонд болсон дуудлага худалдаагаар 4.66 сая евро (ойролцоогоор 5.27 сая ам.доллар)-ын үнэ хүрч зарагджээ. Энэхүү сэлмийг Наполеон 1802 онд тусгайлан захиалж хийлгэн, хаанчлалынхаа турш хадгалж байсан түүхтэй.

Дуудлага худалдааг “Giquelo” компани зохион байгуулсан бөгөөд анхны үнэ нь 700 мянгаас 1 сая еврогийн хооронд байсан ч түүхэн үнэ цэнэ, ховор нандин байдлаасаа шалтгаалан хэд дахин өссөн үнэ хүрсэн байна.

Сэлмийг Наполеон дараа нь өөрийн итгэлт хүн болох маршал Эммануэл де Грушид бэлэглэсэн. Грушигийн гэр бүл уг сэлмийг 1815 оны Ватерлоогийн тулалдааны дараа өнөөг хүртэл хадгалж иржээ.

Түүхийн хувьд онцлогтой энэхүү сэлэм нь Наполеонтой холбоотой эд зүйлсийн дуудлага худалдааны хамгийн өндөр үнийн нэг болж, 2007 онд 4.8 сая еврогоор зарагдсан Маренгогийн тулалдаанд хэрэглэж байсан сэлэмтэй эн зэрэгцсэн дүн болж байна.

Мөн энэ төрлийн цуглуулгын хүрээнд:

• 2023 онд Наполеоны гурвалжин оройтой малгай 1.9 сая еврогоор,

• 2024 онд гар буунууд нь 1.69 сая еврогоор тус тус зарагдсан түүхтэй.

Түүнчлэн Наполеоны адил төрлийн өөр нэг сэлэм одоогоор ОХУ-ын Санкт-Петербург дахь Эрмитаж музейд хадгалагдаж буй бөгөөд энэхүү дуудлага худалдаагаар зарагдсан хувилбар нь цорын ганц хувийн өмчид байсан жинхэнэ дурсгалт зүйлд тооцогдож байв.

Эх сурвалж: France 24, Drouot