Дэлхийд анх удаа хүн дүрст роботуудын тулааныг харуулсан боксын тэмцээн Хятадын Ханжөү хотод болж, технологийн хөгжлийг сонирхогчдын анхаарлыг татлаа. “Unitree Robotic” компани энэ тэмцээнийг “Unitree Fist King: Awakening” нэртэйгээр зохион байгуулсан бөгөөд тулаан нь тай бокс буюу муайтай төрлөөр явагдсан нь уламжлалт тулааны техникийг хиймэл оюунтай төхөөрөмжид нутагшуулж чадсаныг илтгэж байна.

Роботуудыг рингэн дээр гаргахаас өмнө инженерүүд тэдгээрийг сайтар тохируулан, ялангуяа тэнцвэрээ хадгалах чадварыг сайжруулахад онцгой анхаарчээ. Хажуугийн цохилт, өвдгөөр өшиглөх зэрэг хурдтай, нарийн техник гүйцэтгэхийн тулд эдгээр “G1” загварын роботуудыг LiDAR мэдрэгч, зай мэдрэгч камер зэрэг өндөр нарийвчлалтай төхөөрөмжөөр тоноглосон байна.

Тэмцээнд оролцсон роботуудыг инженерүүд алсаас удирдаж, дуу хоолойгоор заавар өгдөг систем ашигласан байна. Тэмцээний дүрэм ёсоор унасан робот найман секундийн дотор босож чадахгүй бол ялагдсан гэж тооцжээ. Энэ нь зөвхөн тулааны ур чадвар бус, программчлал, механикийн шийдэлд тулгуурласан шинэ үеийн спортын дүрэм хэмээн тодорхойлогдож байна.

Тус тэмцээний гол зорилго нь “Unitree” компанийн робот техник, инженерчлэлийн дэвшлийг бодит хөдөлгөөн бүхий орчинд туршиж, олон нийтэд танилцуулах явдал байв. “Unitree” компани 2025 оны 12 дугаар сард дараагийн тэмцээнээ илүү өргөн цар хүрээтэй, сонирхол татам байдлаар зохион байгуулахаар төлөвлөж байгаа бөгөөд эхний тэмцээнээс олж авсан туршлага дээрээ үндэслэн роботуудын ур чадвар, үзүүлбэрийг улам боловсронгуй болгохоор ажиллаж байна.

Тэмцээнд ашигласан “G1” загварын роботууд нь 35-47 кг жинтэй, 127 см орчим өндөртэй бөгөөд зарим нь боловсруулалт сайтай “G1 EDU” хувилбар байжээ. Энэ нь роботын өндөр нарийвчлалтай хөдөлгөөн хийх чадварыг харуулсан төдийгүй, инженерчлэлийн шинэ шатанд гарсан технологийг бодитоор танилцуулсан онцлох үйл явдал болсон юм.

Эх сурвалж: CNN