Францын Ерөнхийлөгч Эммануэл Макроны Вьетнамд хийж буй төрийн айлчлалын хүрээнд хоёр улс 9 тэрбум еврогийн өртөг бүхий хамтын ажиллагааны гэрээ байгуулжээ. Макрон сэтгүүлчдэд өгсөн мэдэгдэлдээ “гэрээ нь агаарын тээвэр, төмөр зам зэрэг чухал салбаруудыг хамарсан өргөн хүрээний хэлэлцээр” болсон хэмээн онцолсон байна. Энэ нь батлан хамгаалах, нисэхийн болон эрчим хүчний салбар дахь хоёр орны бат бөх түншлэлийг харуулж буйг тэрбээр цохон тэмдэглэжээ.
Франц улс нь Вьетнамын Европ дахь тав дахь том худалдааны түнш бөгөөд 2024 онд хоёр талын худалдааны эргэлт 5.42 тэрбум ам.долларт хүрч, өмнөх оноос 12.9 хувиар өссөн байна. Мөн Франц нь Вьетнамд хөрөнгө оруулалт хийж буй 147 улсын дундаас 16 дугаарт эрэмбэлэгдэж байгаа бөгөөд нийт 3.95 тэрбум ам.долларын хөрөнгө бүхий 700 төсөл хэрэгжүүлж байна.
Үүнээс гадна Франц улс Вьетнамд хөгжлийн тусламж үзүүлдэг Европ дахь гол хандивлагч орны нэг юм. Тус улс нийт 16.7 тэрбум еврогийн хөнгөлөлттэй зээлийг олгосон бөгөөд энэ санхүүжилт дэд бүтэц, хөдөө аж ахуй, ногоон эдийн засаг, санхүүгийн үйлчилгээ, технологи дамжуулах зэрэг салбарт хэрэгжих төслүүдэд зориулагдаж байгаа юм.
Эх сурвалж: TASS
