Япон улсын нийслэл Токио хотод 200 мянга орчим хүн тогтмол амьдрах сууцгүй болж, зарим нь орон гэрийн оронд манга-кафед хоноглох явдал түгээмэл болжээ. Манга-кафе буюу номын сан бүхий интернет кафе нь зөвхөн зугаа цэнгэлийн газар биш, харин түр орогнох байршил болж хувирсан байна.

Орон сууцны үнэ Японд сүүлийн жилүүдэд эрчимтэй өсөж, байрны түрээс залуусын цалин хөлстэй тэнцэхгүй болжээ. Жишээлбэл, хотын төвд байрлах жижигхэн урланг сард дунджаар 80 мянган иенээр түрээслэх бол хотын захад ч 50–70 мянга орчим иен шаардлагатай. Гэтэл хөдөлмөрийн хөлсний доод хэмжээ амьдралын наад захын зардлыг ч нөхөж чадахгүй байгаа тул олон залуус тогтмол орон гэргүй, манга-кафе, 24 цагийн дэлгүүр, тэр ч бүү хэл гүүр, барилгын дээвэр дээр шөнийг өнгөрөөх болсныг мэргэжилтнүүд онцолжээ.

Зарим нь бүр орон гэргүй амьдралдаа дасан зохицож, үүргэвчиндээ бүхий л хэрэгцээтэй зүйлээ авч явах болсон байна. Жишээлбэл, Ишида гэх нэгэн эр сүүлийн таван жилийн хугацаанд 500 гаруй айлд хоногложээ. Тэрээр ганцаардсан хөгшчүүдтэй харилцаж, тэдэнд хань болохын сацуу өөрөө ч хоног төөрүүлдэг бөгөөд тэдэнтэй хамт оройн хоол идэж, ярилцах нь хөгшчүүдийн хувьд ч сэтгэлийн дэм болдог гэж ярьсан байна.

Орон сууцны хүртээмжийн энэ хямрал Японд 1990-ээд оны эдийн засгийн уналтаас хойш гүнзгийрсэн бөгөөд өнөөдөр ялангуяа залуусын дунд амьдрах орчин, санхүүгийн боломжийн зөрүү асар их болжээ. Төрөөс орон сууцны хөтөлбөр, түрээсийн дэмжлэг үзүүлэх бодлого нэн яаралтай шаардагдаж буйг мэргэжилтнүүд анхааруулж байна.

Эх сурвалж: Gazeta.ru