Эротик контент түгээдэг дэлхийд танигдсан OnlyFans платформыг АНУ-ын Forest Road хөрөнгө оруулалтын компанийн тэргүүлдэг хөрөнгө оруулагчдын бүлэг худалдан авахаар хэлэлцэж байгаа талаар Reuters агентлаг мэдээлжээ. Наймааны үнийг 8 тэрбум ам.доллар гэж үнэлсэн бөгөөд энэ нь дижитал платформын хувьд өндөр дүнтэй хэлцэлд тооцогдож байна.

Хэлэлцээр 2025 оны гуравдугаар сараас хойш явагдаж байгаа бөгөөд ойрын хугацаанд үр дүн нь зарлагдах хүлээлттэй байна. Худалдан авалтын хэлцэлд Forest Road-оос гадна бусад хөрөнгө оруулагчид, тухайлбал эхнээс нь эзэмшиж буй Fenix International Ltd компани ч мөн оролцож байгаа бөгөөд тэд өөр сонирхогч талуудтай ч харилцаж байгааг эх сурвалжууд дурджээ.

OnlyFans нь коронавирусний цар тахлын үеэр онцгой хурдацтай өсөлт үзүүлсэн бөгөөд 2023 оны арваннэгдүгээр сарын байдлаар жилийн орлого нь 6.6 тэрбум ам.долларт хүрсэн байна. Тус платформын орлого 2020 онд ердөө 375 сая доллар байсан нь богино хугацаанд хэрхэн дэлгэрснийг илтгэнэ.

Тус компанийн цорын ганц хөрөнгө оруулагч нь украин гаралтай америк иргэн, 43 настай Леонид Радвинский бөгөөд тэр 2018 онд компанийг худалдан авсан. Сүүлийн гурван жилд тэрбээр өөртөө нийт 1 тэрбумаас дээш хэмжээний дивиденд хүртсэн хэмээн агентлаг мэдээлжээ. Радвинский хаана амьдардаг нь тодорхойгүй ч OnlyFans компани нь Лондонд төвтэй хэвээр байгаа юм.

Эх сурвалж: Officelife.media, Reuters